Адыгэ Республикэм икъэлэ шъхьаIэу Мыекъуапэ имэфэкI мафэ Iоныгъом и 3 — 4-м игъэкIотыгъэу хагъэунэфыкIыгъ.

Къалэр мэфэкI шъуашэм ди­штэу зэтырагъэпсыхьагъ. Къа­лэм итарихъ, культурэ, спортым, нэмыкIхэм афэгъэхьыгъэ нэ­рылъэгъу IэпыIэгъухэр кIэракIэх. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм ехьылIэгъэ тхы­гъэхэр, сурэтхэр дахэу къэ­лъа­гъох. Жъогъо 12-р къызыхэлыдыкIырэ адыгэ быракъым ису­рэтхэр лъэгъупхъэх. Урысыем, Адыгэ Республикэм якъэралыгъо быракъхэр Мыекъуапэ ичIы­пIэ хэхыгъэхэм ащэбыбатэх.

Республикэм икъэлэ шъхьаIэ цIыфхэм агъэдахэ. Мыекъуапэ лъэпкъи 100-м нахьыбэ щызэгурыIоу щэпсэу. Хэбзэ шапхъэ­хэр щыIэныгъэм щыпхыращыхэзэ, якультурэ, ятарихъ, яшэн-хабзэхэр лъэпкъхэм къаухъумэ.

АгъашIох, щытхъур афаIо

Iоныгъом и 3-м КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр-Кавказ къутамэ мэфэ­кIым щыщ зэхахьэ щырагъэ­кIокIыгъ.

Мыекъуапэ иадминистрацие ипащэу Геннадий Митрофановыр, Мыекъуапэ инароднэ депутатхэм я Совет итхьаматэу Джарымэкъо Азмэт мэфэкI Iофтхьабзэм къыщыгущыIагъэх. «Мыекъуапэ ицIыф гъэшIуагъ» зыфиIорэр къалэм и Мафэ ехъулIэу Мыекъуапэ щыпсэухэ­рэм афагъэшъошэныр шэнышIу зэрафэхъугъэр хагъэунэфы­кIыгъ.

Адыгэ Республикэм иклиническэ сымэджэщ иотделение ипащэу, врачэу Щыко Руслъан «Мыекъуапэ ицIыф гъэшIуагъ» зыфиIорэ щытхъуцIэр къэзыушыхьатырэ тхылъыр Геннадий Митрофановымрэ Джарымэкъо Азмэтрэ ратыжьыгъ.

Василий ыкIи Алексей зэшхэу Соловьевхэм ацIэкIэ къалэм ишIухьафтынэу агъэнэфагъэр Мые­къуапэ икъэлэ клиническэ сымэджэщ иврач-хирургэу Игорь Кеосиди, Мыекъуапэ иполиклиникэу N 3-м иврач-эндокринологэу Алла Пропастинам, Мые­къуапэ ичIыпIэ зыгъэIорышIэ­жьыпIэу N 2-м ипащэу Тамара Ушаковам афагъэшъошагъэх.

Апэрэ классым ихьагъэхэр

Адыгэ Республикэм и Пра­вительствэ зычIэт Унэм дэжь къы­щырагъажьи, Мыекъуапэ икIэ­лэеджакIохэу апэрэ классым ихьагъэхэр къалэм иурамхэу Советскэм, Краснооктябрьскэм къарыкIуагъэх. Оркестрэр апэ итэу орэдышъо дахэхэр зэхахьэм щыIугъэх. В. И. Лениным ыцIэ зыхьырэ пчэгум щызэхащэгъэ концертышхом кIэлэцIыкIухэр къыщышъуагъэх, Iэпкъ-лъэпкъхэр зыгъэпытэрэ шIыкIэхэр къафагъэлъэгъуагъэх.

КIэлэцIыкIухэм гущыIэ щэ­рыохэр къаIонхэм фэгъэсэгъэнхэм, къэшъонхэм, зэгурыIоныгъэ ахэлъыным афэшI зэхэщакIохэм къыдалъытагъэр бэ.

— Апэрэ классым щеджэрэ кIэлэцIыкIу 1800-рэ тимэфэкI зэхахьэ хэлажьэ, — къытиIуагъ Мыекъуапэ иадминистрацие культурэмкIэ и ГъэIорышIапIэ ипащэу Цэй Розэ. — Непэ алъэ­гъурэр, зэхахырэр шIукIэ агу къинэжьыщт. КIэлэцIыкIу пэпчъ ынэхэм машIор къа­кIехы…

Ны-тыхэу Кожубекхэм къыта­Iуагъ зэхахьэр зэрашIогъэшIэ­гъоныр, пIуныгъэ мэхьанэ иIэу зэралъытэрэр. Яромир Поповыр, Къуанэ Мадинэ апэрэ классым щеджэхэрэм ащыщ. Пшъэшъэ­жъые ищыгъэу Къуанэ Мадинэ спортым, культурэм афэщагъэу къэлъагъо, пчэгум дахэу щэуджы. Къалэм икIэлэцIыкIу ансамблэу «Сэлам» зыфиIорэм Теуцожь Алыйрэ Чэтыжъ Симэрэ ипащэх. Къашъоу «Ислъамыер», нэмыкI лъэпкъ къашъохэр «Сэламым» дахэу къышIыгъэх. Апэрэ классым щеджэрэ сабыйхэм искусствэр якIас, ансамблэхэм шIэхэу ахэхьащтых.

Адыгэ Республикэм и ЛIы­шъхьэу КъумпIыл Мурат, Прави­тельствэм, Парламентым, къа­лэм иадминистрацие якъулы­къушIэхэр кIэлэцIыкIухэм язэхахьэ зэрэкIорэм лъыплъагъэх, Iэгу афытеуагъэх.

МэфэкIым зеIэты

ЕджапIэхэм, IофшIапIэхэм яIэпэIасэхэм якъэгъэлъэгъонхэр, ермэлыкъхэр Мыекъуапэ иурам шъхьаIэхэм ащызэхащагъэх. Урамхэу Краснооктябрьскэмрэ Советскэмрэ зыщызэуа­лIэхэрэм дэхьэпIэ дахэ щагъэ­псыгъ. «Мыекъуапэ шIу сэлъэгъу» зыфиIорэ сурэтыр итеплъэ­кIэ нахь къахэщы.

ЕджапIэхэм, ныбжьыкIэ объединениехэм, нэмыкIхэм якъэгъэлъэгъонхэм КъумпIыл Мурат хэбзэ къулыкъушIэхэр игъусэхэу яплъыгъ. Адыгэ къэралыгъо университетым, Мыекъопэ къэралыгъо технологическэ уни­верситетым якIэлэегъаджэхэм, еджакIохэм лъэхъаным диштэрэ къэгъэлъэгъонхэр агъэпсыгъэх.

АР-м икIэлэегъэджэ колле­джэу Хъ. Андырхъуаем ыцIэ зы­хьырэм исурэтышIхэм ясэнау­щыгъэ гум къегущыIыкIы. Пшъа­шъэм тырашIыкIырэ сурэтыр псэ зыпыт IофшIагъэу щыт. Iазэм шIыкIабэ къызэригъотырэр ти­нэрылъэгъу.

Республикэм искусствэхэмкIэ иколледжэу У. Тхьабысымэм ыцIэ зыхьырэм, нэмыкIхэм якъэ­гъэлъэгъонхэм узыIэпащэ. ­Адыгэ лъэпкъ музыкальнэ Iэмэ-псымэхэр, анахьэу шыкIэпщынэр, сы­дэу даха!

Спортым узыIэпещэ

Спорт гимнастикэм, художественнэ гимнастикэм, дзюдом, тхэквондом, самбэм, ушу-саньдам, кушъхьэфэчъэ спортым апы­щагъэхэм, фэшъхьафхэм янэрылъэгъу IэпыIэгъухэр щы­Iэныгъэм къыхахыгъэх. Кушъхьэ­фэчъэ спортымкIэ Александр Евтушенкэм, Елизавета Ошурковам, СтIашъу Мамыр, нэмыкI­хэм ясурэтхэр дахэу къэлъа­гъох.

Республикэм испорт еджапIэу N 2-м ипащэу Хъот Юныс ныбжьыкIэхэр игъусэхэу пчэгум итэу Iэ­пэIасэхэм якъэгъэлъэгъон хэ­лажьэ.

— БэкIэ узэрыгушхон плъэ­кIыщт ныбжьыкIэхэр, лъэпкъ IэпэIасэхэр тиIэх, — къыти­Iуагъ зэлъашIэрэ сурэтышI-модельер цIэрыIоу СтIашъу Юрэ.

Культурэм и Унэу «Ги­гантым» дэжь сурэттеххэм якъэгъэлъэгъонэу щызэхащагъэм уепIу, уегъэгупшысэ. Сурэти 100-мэ уяплъы пшIоигъоу ухэщэтыкIы.

— Непэ Iофтхьэбзэ гъэшIэ­гъонхэр Мыекъуапэ щэкIох, мэ­фэкIым ифэмэ-бжьымэ зэратырихьагъэр къыбгурыIонэу щыт. Нэбгырэ пэпчъ ыгу рихьыщтыр мыщ къыщыхихын зэрилъэкIыщтым сицыхьэ телъ. Яныбджэгъу­хэр, Iахьылхэр ягъусэхэу яшIэныгъэ хагъахъозэ уахътэр гум къинэжьынэу агъэкIон алъэ­кIыщт. Мыекъуапэ щыпсэухэрэм мэфэкIым фэгъэхьыгъэу сафэгушIо сшIоигъу. Псауныгъэ пытэ яIэнэу, шIоу щыIэр къадэхъунэу сафэлъаIо. Къалэм зиушъомбгъунэу, хэхъоныгъэхэр ышIынхэу фэсэIо, — къариIуагъ журналистхэм КъумпIыл Мурат.

КъэшъуакIохэм ярекорд

Илъэс 55-м зыныбжь къехъу­гъэ къэшъуакIохэм япчыхьэзэ­ха­хьэ еплъыгъэхэм къэбарэу къа­Iотэжьын алъэкIыщтыр тхылъ заулэ хъущт. Адыгэ Республикэм IофшIэнымкIэ ыкIи социальнэ хэ­хъоныгъэмкIэ иминистрэу Мыр­зэ Джанбэч зэхахьэм хэлажьэхэрэм шIуфэс къарихыгъ. Министерствэмрэ къалэм культу­рэмкIэ и ГъэIорышIапIэрэ кIэщакIо зыфэхъугъэхэ зэхахьэм илъэс 55-рэ зыныбжьхэм къащыублагъэу 90-м нахьыбэ къэзыгъэшIагъэхэр къыщышъуагъэх.

Урысыем культурэмкIэ изаслу­женнэ IофышIэу, Адыгэ Респуб­ликэм инароднэ артистэу, Къэ­бэртэе-Бэлъкъарым изаслуженнэ артистэу Нэныжъ Айдэмыр ансамблэу «Мыекъуапэ инэфы­лъэхэм» ихудожественнэ пащ. КIэлэеджакIохэм яансамблэ «Зэ­факIор» пэшIорыгъэшъэу пчэгум къыщигъэлъэгъуагъ. Зыныбжь илъэс 55-м къехъугъэхэм ахэтхэу ныбжьыкIэхэр уджы­гъэх. «Удж-хъурай» зыфиIорэ къа­шъор пчэгум къызыщыхадзэм, хъураеу зэхэтыхэу урысхэр, ер­мэлхэр, азербайджанхэр, къэн­дзалхэр, адыгэхэр, нэмыкI­хэри къэшъуагъэх. ГъэшIэгъо­ныгъэр культурэм иIофышIэу

А. Зориным «Удж-хъураер» къы­хидзи, фэIэпэIасэу къэшъуа­кIохэр зылъищэнхэ зэрилъэкIыгъэр ары.

Зэхахьэхэр

«Мыекъуапэ, ренэу сыгу уилъ!» зыфиIорэ концертыр, кIэлэцIыкIухэр зыхэлэжьагъэхэ зэхахьэхэр гъэшIэгъоныгъэх. КурэжъыехэмкIэ, самокатхэмкIэ къалэм иурам шъхьаIэ къырыкIуагъэх. «Столичный экипаж» зыфиIорэм хэушъхьафыкIыгъэу тапэкIэ тыкъытегущыIэщт. Ащ анахьэу къыщыхэдгъэщыщтыр сэнаущ кIэлэцIыкIухэм, ны-тыхэм, унагъом изэгурыIоныгъэ щыIэныгъэм чIыпIэу щыряIэр ары. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэ зэнэ­къокъум Мамсырхэм яунагъо «Гран-при» зыфиIорэ шIухьафтыныр къыщыдихыгъ.

Мэрэтыкъохэр, Багъырэкъо­хэр, Сафроновхэр, нэмыкI унагъохэр зэнэкъокъум чанэу хэлэжьагъэх.

ВолейболымкIэ, футболымкIэ, кушъхьэфэчъэ спортымкIэ, фэшъхьафхэмкIи спорт зэнэкъо­къухэр Мыекъуапэ щыкIуагъэх.

ИкIэух тшIогъэшIэгъон

«Си Мыекъуапэ — Кавказым иналмэс-налкъут!» зыфиIорэ пчыхьэзэхахьэр мэфэкIым кIэух фэхъугъ. Адыгэ Республикэм, Мыекъуапэ афэгъэхьыгъэ орэдхэр къыщаIуагъэх. Еутых Вячеслав, ЛIыбзыу Аслъан, Хъурэнэ Азэ, Шали, нэмыкIхэм тигуапэу тядэIугъ. Купэу «Румсервик» иорэдхэр концертым икIэух щыIугъэх.

МэфэкI концертыр зезыщэгъэ артистэу Мэкъулэ Руслъан Мые­къуапэ итарихъ фэгъэхьыгъэ уп­чIэхэр, джэуапхэр уахътэм епхыгъэхэу ыгъэпсыгъэх. Зэнэ­къокъоу зэхищагъэм хагъэунэфыкIырэ чIыпIэхэр къыщыдэзыхыгъэхэм афэгушIуагъ, шIу­хьафтынхэр аритыжьыгъэх.

Пчыхьэм сыхьатыр 10 мы­хъупэу мэфэкI мэшIоустхъохэм Мыекъуапэ имамыр ошъогу къы­щызэлъагъэнэфыгъ. Ятеплъэ­кIэ щамсый дахэм фэдэу зэпэ­жъыухэзэ мэфэкI пчыхьэзэха­хьэр кIэухым фэкIуагъ.

Мамырэу псэу, лажьэ, ти­къэ­лэ гупс. О уихэхъоныгъэхэм тарэгушхо!

ЕмтIылъ Нурбый.