Лъэпкъ проектэу «Щынэгъончъэ ыкIи шэпхъэшIухэм ади­штэрэ гъогухэр» зыфиIорэм къыдыхэлъытагъэу, гъэсэныгъэм епхыгъэ ыкIи цIыфхэм языгъэпсэфыгъо уахътэ зыщагъа­кIорэ учреждениехэм якIурэ гъогу Iахь заулэ Адыгеим икъэлэ шъхьаIэ щагъэкIэжьыгъ.

ГущыIэм пае, Гоголым ыцIэ зыхьырэ урамым щыщэу лицееу N-8-м екIуа­лIэрэм илъэсрыкIо гъогуи, транспортыр зэрыкIорэри агъэцэкIэжьыгъ, тамыгъа­кIэхэр щагъэуцугъ, зэпырыкIыпIэр фыжьрэ гъо­жьырэкIэ агъэлагъ.

Къалэм иурам шъхьа­Iэхэм ащыщэу Пушкиным ыцIэ зыхьырэм игъэцэ­кIэжьын шышъхьэIу мазэм аухыгъ. Ащ тетых кIэлэцIыкIу IыгъыпIэу N 9-р, Адыгэ къэралыгъо уни­верситетым филологиемкIэ ифакультет зычIэт унэр, гимназиеу N 5-р, Мые­къопэ къэралыгъо технологическэ университетым экономикэмкIэ ифакультет зычIэтыр, АР-м и ­Лъэпкъ театрэу И.С. Цэим ыцIэ зыхьырэр. Ахэм апэ­блэгъэ гъогу зэпырыкIыпIэхэр чыжьэкIэ къэлъэ­гъонхэу агъэлагъэх, тамыгъэхэр агъэкIэжьыгъэх, зыщищыкIагъэм транспортыр зэрыкIорэмрэ лъэс­рыкIо гъогумрэ щызэты­раутыгъ.

Джащ фэдэу лъэпкъ про­ектым къыдыхэлъытагъэу мы илъэсым гъозэ­рыплъэхэр Мыекъуапэ ичIыпIиплIымэ ащагъэуцугъэх. Ахэри еджапIэхэм апэблагъэх.

Урамхэу Свободнэмрэ Крестьянскэмрэ зыщызэблэкIыхэрэм щагъэ­псыгъэ комплексым еджапIэу N 10-м екIурэ гъогур щынэгъончъэ къешIы. Пушкиным ыцIэ зыхьырэмрэ Кубанскэмрэ язэхэкIыпIэ тырагъэуцуагъэр психолого-педагогическэ IэпыIэ­гъумкIэ Гупчэм пэблагъ.

Ащ имызакъоу, Адыгеим игъогоу шъолъыр мэхьанэ зиIэхэм ащыщхэм лъэсрыкIо гъогухэр ащагъэпсы­гъэх. Ащ къыхиубытагъэхэр Кощхьэблэ районымкIэ селоу Натырбовэр, Шэу­джэн районымкIэ къуа­джэхэу Къэбыхьаблэрэ Пщычэурэ. Джы ахэм адэт еджапIэхэм якIурэ гъогу­хэр щынэгъончъэ хъугъэх.

Мы уахътэм Красногвардейскэ районымкIэ къуа­джэу Хьатикъуае иурамэу Шоссейнэм гъогур щагъэцэ­кIэжьы, лъэсрыкIохэм апае шъхьафэу агъэпсыгъ, чэщырэ къэнэфынэу ашIыгъ.

ШIэныгъэм и Мафэ къэ­мысызэ, гъэсэныгъэмкIэ Адыгеим иучреждениехэм зэкIэми апэблагъэу щыIэ гъогу зэпырыкIыпIэхэр агъэкIэжьыгъэх, «зебрэ­хэр» джы гъожьырэ фы­жьырэкIэ гъэлагъэх.