УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ипхырыщын пае аштагъ федеральнэ проектэу псы къабзэ цIыфхэм аIэкIэгъэхьэгъэным тегъэпсыхьагъэр.

Ащ къыдыхэлъытагъэу Адыгеим ит псэупIэхэм псым икъычIэщыпIэхэр, икIуапIэхэр ащызэблахъух, ащагъэцэкIэжьых.

АР-м псэолъэшIынымкIэ, транспортымкIэ, псэу­пIэ-коммунальнэ ыкIи гъогу хъызмэтымкIэ и Ми­нистерствэ къызэри­тыгъэмкIэ, 2022-рэ илъэсым псым епхыгъэ псэолIи 7 республикэм ща­шIынышъ, щатIупщынэу агъэнэфагъ. Ахэм ащыщэу щыр Теуцожь районыр ары зыхахьэрэр.

Къуаджэу Гъобэкъуае щырагъэжьагъэр ыкIэм рафылIагъэу Министерствэм ипресс-къулыкъу къетхы. Псэуалъэм ипроект къызэрэдэлъытагъэм тетэу псы къычIэщыпIитIу аубырыугъ, башнер, псыр зыгъэкъэбзэщт оборудованиер агъэуцугъэх, чIыпIэу псэуалъэм къызэ­лъиубытырэр къашIыхьэгъах, зэрагъэфэжьынэу ары къэнагъэр.

Псэуалъэм ишIын ­лъэпкъ сомэ миллион 19,3-рэ пэIуагъэхьагъ. Мы мазэм аухынышъ атIупщынэу ары гухэлъэу яIэр.