Адыгэ къэралыгъо университетым кIэу падразделениитф иIэ хъугъэ. Ахэр: «Институт качества жизни», «Институт гуманитарного знания и культуры», «Институт живых систем и инженерии здоровья», «Институт точных наук и цифровых технологий» ыкIи «Институт права».

Проектэу «Приоритет 2030» зыфиIорэм ипхырыщын тегъэпсыхьэгъэ программэу универси­тетым стратегическэ хэхъо­ныгъэхэр егъэшIы­гъэнхэм фэгъэхьыгъэм ар къы­ды­хэлъытагъ ыкIи фа­культетхэр зэдэлажьэхэзэ, яопыт­кIэ, яшIэныгъэ­хэмкIэ зэдэгуащэхэзэ зэ­шIохы­гъэн фэе пшъэ­рылъ шъхьа­Iэхэр ары зы­тегъэпсыхьагъэр.

Университетым ипшъэ­рылъхэм ащыщ хьисапым, ИТ-технологиехэм алъэныкъокIэ студентхэм шIэныгъэу яIэр агъэфе­дэжьын амал къэзытырэ Гупчэ зэхэщэгъэныр.

— Университетыр ащ тетэу кластерхэмкIэ зэ­теутыгъэмэ гъэсэныгъэм ылъэныкъокIэ IофшIэнри, научнэ ушэтынхэри зэ­пхыгъэнхэмкIэ, программакIэхэр, лъэныкъуакIэхэр гъэпсыгъэнхэмкIэ ащ ишIуагъэ къэкIощт. Ау анахь шъхьаIэр лъэхъаным диштэу гъэсэныгъэ зэрагъэгъотынымкIэ, ушэтын зэфэшъхьафхэм ахэлэжьэнхэмкIэ студентхэм амалыкIэхэр къызэраритыщтыр ары, — къыIуагъ Адыгэ къэралыгъо уни­верситетым иректорэу Мамый Даутэ.

АКъУ-М ипресс-къулыкъу