Мыекъопэ къэралыгъо технологическэ университетым студентхэм апае чIыпIакIэ (площадкэ) къыщызэIуахыгъ.

Мы хъугъэ-шIагъэм мэхьанэ иIэу щыт, сыда пIомэ Урысыем иапшъэрэ еджэпIи 5-у мыщ фэдэ площадкэхэр къызэIузыхыгъэхэм ясатырэ МГТУ-р хэ­хьагъ.

Урысыем иныбжьыкIэхэм анахьыбэр университетхэм зэ­рэщеджэщтхэм пылъых, студент площадкэ зэтегъэпсыхьагъэхэр ныбжьыкIэхэм заушэтын амал­хэр ятыгъэным фэIорышIэх. Ащ зэрепхых мэхьанэшхо зиIэ ныб­жьыкIэ проектхэр, УФ-м гъэ­сэныгъэмкIэ ыкIи шIэныгъэмкIэ и Министерствэ, Урысые об­ществэу «Знание» ыкIи АНО-у «Россия — страна возможностей» зыфиIорэр, джащ фэдэу Урысыем истудентхэм язэнэ­къокъоу «Твой ход» ыкIи Дунэе зэнэкъокъоу «Большая перемена» зыфиIохэрэр.

«Студенческэ площадкэр мэфэкI шIыкIэм тетэу къызэ­Iуахыгъ. Iофтхьабзэм хэлэжьагъэх Мыекъопэ къэралыгъо технологическэ университетым иректорэу Къуижъ Саидэ, Мые­къопэ медицинэ колледжым ипа­щэу Алексей Самоквитовыр, Адыгэ общественнэ организациеу «Общество Знание» зыфиIорэм иправление итхьаматэу Ацумыжъ Казбек, технологическэ факультетым ия 3-рэ курс щеджэу Павел Дорошенкэр.

— Ыпэ титэу Iоф тшIэн тлъэ­кIынэу амал зэрэтиIэр шIукIэ зыфэтэлъэгъужьы. Студентхэр творческэ Iофхэм, проектхэм ыкIи нэмыкI Iофтхьабзэхэм ахэлэжьэнхэмкIэ, гупшысакIэхэр яIэу университетым яшIуагъэ рагъэкIынымкIэ мы проектым мэхьанэшхо иI. НыбжьыкIэ политикэр щыIэныгъэм щыпхы­ращыным, студент объедине­ниехэр ыкIи ныбжьыкIэ сообществэхэм хэхъоныгъэ ягъэшIыгъэным ренэу тынаIэ атет, — къыIуагъ Къуижъ Саидэ.

Студентхэр, анахьэу апэрэ курсым ихьагъэхэр, еджэным псынкIэу хэгъозэнхэмкIэ площадкэр IэпыIэгъушIу хъущт, ащ нэмыкIэу зыхэлэжьэнхэ алъэ­кIыщт зэнэкъокъухэр къыха­хынхэмкIэ, проектхэр агъэпсынхэмкIэ, ягухэлъхэр щыIэныгъэм щыпхыращынымкIэ IэпыIэгъу къафэхъущт.

Площадкэм икъызэIухын хахьэу студентхэм япроектэу «Твой ход» зыфиIорэр федеральнэ каналым ипрограммэу «Больше, чем путешествие» зыфиIорэм хэлажьи, Урысыем зекIо къыщекIокIынхэмкIэ те­кIоныгъэ къыдихыгъ.

Мыекъопэ къэралыгъо тех­нологическэ университетым истудентхэм яуахътэ шIуагъэ къытэу агъэкIонымкIэ зэкIэ амалхэр аIэкIэлъых. Джы шIоигъоныгъэ зиIэ пэпчъ еджэ- ныр къызиухыкIэ площадкэм кIон ыкIи иныбджэгъухэм аIу­кIэн, Iофтхьэбзэ цIыкIухэр зэхищэнхэ ыкIи фильмэ еплъын ылъэкIыщт.