«Спартак» Москва — «Зенит» Санкт-Петерург — 2:1. Iоныгъом и 2-м ешIэгъур Москва щыкIуагъ.

Урысыем футболымкIэ икомандэ анахь цIэрыIохэм ащыщхэу «Спартак» ыкIи «Зе­нит» яветеранхэр зэдешIагъэх.

Павлюченко, Тихонов, Онопко, Бояринцев, Ширко, Филимонов, Ребров, Самедов, Титов…

Малофеев, Широков, Денисов, Аршавин, Кержаков, Данни, Зырьянов, Тимощук, Погребняк, Быстров…

ЗылъэкъуацIэ къетIуагъэхэр, нэмыкIхэри ныбджэгъу ешIэгъум хэлэжьагъэх. Футболым щызэлъашIэрэ Евгений Ловчевым къызэри­Iуагъэу, ешIакIохэм IэпэIэсэныгъэ ин, зэнэ­къокъу дахэ къагъэлъэгъуагъ. Джырэ уахътэ хэгъэгум изэнэкъокъу, икомандэхэм къащамыгъакIэу шIыкIэшIухэр къагъэлъэгъуа­гъэх.

«Зенит» хэтэу И. Денисовым Iэгуаор къа­IэкIихи, метри 10-м нахьыбэкIэ зыпэ­чыжьэ къэлапчъэм дэуагъ. УхъумакIохэм къа­дзы­хьагъэу щытыгъэми, хъагъэм Iэгуаор ри-­ дзагъ — 0:1.

Д. Бояринцевым чыжьэу ыпэкIэ ытыгъэ Iэгуаом Р. Павлюченкэр лъычъагъ, ешIапIэм тефэзэ къэлапчъэм Iэгуаор дидзагъ — 1:1.

ЗэIукIэгъур кIэухым зыщыфэкIорэ уахътэм А. Ширком ухъумакIор къызэринэкIи, хъа­гъэм Iэгуаор ридзагъ — 2:1.

Андрей Аршавиныр, Александр Кержаковыр, фэшъхьафхэри «Зенит» дэгъоу щешIагъэх. Андрей Тихоновыр, Егор Титовыр, Виктор Онопко, фэшъхьафхэр «Спартак» къыхэдгъэщыхэ тшIоигъу.

Футболым иветеранхэр Урысыем ихэшыпыкIыгъэ командэ хэтхэу Европэм, дунаим ащыкIорэ зэнэкъокъухэм ахэлэжьагъэх.

— ЕшIакIохэм щысэшIу къагъэлъэгъуагъ, ныбжьыкIэхэр тапэкIи акIырыплъыщтых, — къыIуагъ «Спартак» иветеранхэм якомандэ итренер шъхьаIэу Олег Романцевым, — лъэ­шэу сагъэгушIуагъ, гушхоныгъэ сагъэшIыгъ.

Андрей Аршавиным, Андрей Тихоновым зэхэщакIохэм ешIэгъур зэрэкIуагъэм афэгъэ­хьыгъэ гущыIэ фабэхэр къаIуагъэх. Футболыр зыгу рихьыхэрэр ягуапэу зэнэкъо­къум стадионым щеплъыгъэх.

ЗэIукIэгъум хэлэжьагъэхэм нэпэеплъ ме­даль­хэр, нэмыкI шIухьафтынхэр аратыжьыгъэх.

Шъугу къэтэгъэкIыжьы «Зенит» ыкIи «Спар­так» яветеранхэм яапэрэ ешIэгъоу Санкт-­Петербург щыкIуагъэм бысымхэм текIоныгъэр къызэрэщыдахыгъэр.