Мыекъуапэ имэфэкI Iоныгъом и 4-м республикэм икъэлэ шъхьаIэ игъэкIотыгъэу щыхагъэунэфыкIыщт. Ащ фэ­гъэхьыгъэ программэр я 5-рэ нэкIубгъом ижъугъотэщт.

Iоныгъом и 3-м сыхьатыр 10-м культурэмкIэ Унэу «Гигантымрэ» къэлэ паркымрэ яIэгъо­блэгъу лъэпкъ Iэпэщысэхэм якъэгъэлъэгъон къыщызэIуа­хыщт. Сыхьатыр 10-м Лениным ипчэгу цIыфхэр щызэрэугъоищтых, Мыекъуапэ ичIыпIэ да­хэхэр а зы уахътэм ахэм зэрагъэлъэгъущтых. Къэлэдэсхэри хьакIэхэри художественнэ фильмэу «Тихая застава» зыфиIорэм пчыхьэм сыхьатыр 8-м культурэмкIэ Унэу «Гигантым» дэжь щеплъынхэ алъэкIыщт.

Iоныгъом и 4-м пчэдыжьым сыхьатыр 8-м къыщегъэжьагъэу 2-м нэс мэфэкI ермэлыкъэу урамэу Советскэм щыкIощтым гъомылэпхъэ, товар лъэпкъ зэ­фэшъхьафхэр щащэщтых. Апэрэ классым ихьагъэхэм япарад сыхьатыр 10-м къыщегъэжьа­гъэу 11.30-м нэс Лениным ипчэгу щыкIощт.

Джащ фэдэу мы мафэм ныбжьыкIэ объединениехэм, еджапIэхэм, КТОС-хэм, лъэпкъ Iэпэщысэхэр зышIыхэрэм якъэгъэлъэгъонхэр къызэIуахыщтых. Мыекъуапэ дэсхэм искусст­вэхэмкIэ гъэхъагъэхэм нэIуасэ зызщафашIын алъэкIыщт къэгъэ­лъэгъонхэр, мастер-классхэр зэхащэщтых, лъэпкъ Iэпэщысэхэу агу рихьырэр ахэм къащэфын алъэкIыщт. Пчэдыжьым сыхьатыр 10-м къыщегъэжьа-гъэу 1-м нэс культурэмкIэ Унэу «Гигантым» дэжь сурэттехынымкIэ зэнэкъокъу щызэхащэщт. Ащ сурэтхэр къыщагъэлъэгъощтых, зэнэкъокъум щатекIохэрэм тынхэр афагъэшъошэщтых. ФутболымкIэ зэнэкъокъу гимназиеу N 22-м сыхь. 10 —12-м щыкIощт. АКъУ-мрэ Мые­къуапэ игурыт еджапIэхэмрэ яспортзалхэм сыхь. 11-м къыщыублагъэу 4-м нэс волейболымкIэ зэнэкъокъухэр ащыкIощтых.

Сыхьатыр 11-м къыщегъэжьагъэу 3-м нэс автофестивалэу «Мыекъуапэ-2022-рэ» зыфиIорэр автомобиль бэдзэрым дэжь щыкIощт. Автомобиль лъэпкъ зэфэшъхьафхэр мыщ къыща­гъэлъэгъощтых, зэнэкъокъухэр щызэхащэщтых. Сыхьатыр 11-м къыщегъэжьагъэу 3-м нэс фестивалэу «Дети в городе будущего» зыфиIорэр къэлэ паркым дэжь щыкIощт. ЗыдэщыIэхэ чIыпIэм игъэунэфынкIэ къэлэ спорт зэнэкокъухэр «Мэздахэ» идэкIояпIэ дэжь мафэм сыхь. 12-м щегъэжьагъэу 4-м нэс щызэхащэщтых.

Къалэм исамодеятельнэ твор­ческэ коллективхэм яконцертэу «Мыекъуапэ, ренэу сыгу уилъ!» зыфиIорэр «Ракушкэм» дэжь мафэм сыхьатыр 3 — 5-м къыщатыщт. Къэлэ парк дэхьапIэм дэжь сыхьатыр 4-м къыщегъэжьагъэу 6-м нэс Мые­къуапэ имэфэкI фэгъэхьыгъэ концертыр щыкIощт.

Сыхьатыр 3-м къыщегъэжьагъэу 5-м нэс кIэлэцIыкIу курэ­жъыехэм, самокатхэм, кушъ­хьэфачъэхэм япарад урамэу Краснооктярьскэм щыкIощт. КIэлэцIыкIу курэжъые, самокат, кушъхьэфэчъэ нахь кIэракIэм игъэнэфэнкIэ зэнэкъокъоу зэха­щэщтым щатекIохэрэм шIухьафтынхэр афашIыщтых. КъэшъонымкIэ Iофтхьабзэу муниципальнэ духовой оркестрэр зыхэлэ­жьэщтыр пчыхьэм сыхь. 5 — 8-м къэлэ паркым щыкIощт. Зыныбжь илъэс 55-м шъхьа­дэкIыгъэхэр къэшъонымкIэ Ле­ниным ипчэгу щызэнэкъокъунхэ алъэкIыщт пчыхьэм сыхьатыр 5-м къыщегъэжьагъэу 6.30-м нэс. МэфэкI концертэу «Си Мыекъуапэ — Кавказым иналмэс-налкъут!» зыфиIорэр Лениным ипчэгу пчыхьэм сыхьатыр 7-м къыщегъэжьагъэу 9.30-м нэс къыщатыщт. МэфэкI мэ­шIоустхъор чэщым сыхьатыр 9.30-м огум дафыещт.