АР-м и ЛIышъхьэу КъумпIыл Мурат Валерий Заволянскэу дунаир зехъожьым ыуж «Урысые Федерацием и ЛIыхъужъ» зыфиIорэ цIэр къызыфагъэшъошагъэм янэ-ятэхэу Иванрэ Анжэлэрэ Правительствэр зычIэт Унэм тыгъуасэ ащыIукIагъ.

Республикэм ипащэ зэкIэмэ апэу ны-тыхэм афэтхьаусыхагъ, Валерий Украинэм щыкIорэ хэушъхьафыкIыгъэ дзэ операцием хэлажьэзэ, пшъэрылъэу къыфагъэуцугъэхэр зэ­рифэ­шъуашэм тетэу зэри­гъэ­цэкIа­гъэхэм, лIыхъужъныгъэу ащ зэрихьагъэр иныбджэгъухэм, къулыкъу дэзыхьыгъэхэм, ичIыпIэгъухэм егъашIэм агу зэри­лъыщтым къыкIигъэтхъыгъ.

Гвардием истаршэ лейтенантэу Валерий Заволянскэм апшъэрэ дзэ-десантнэ команднэ училищэу къалэу Рязань дэтыр къыухыгъ. Украинэм щы­кIорэ хэушъхьафыкIыгъэ дзэ операцием разведчик купым икомандирэу къулыкъу щихьыщтыгъ. ЖъоныгъуакIэм и 28-м пыир зэрэзекIорэм, зы­дэщыIэм лъыплъэрэ купым хэтэу ащ иуцупIэ горэ къычIи­гъэщыгъ ыкIи зыхэтхэм оборонэр зэха­къутэнышъ, пыим чIэнагъэхэр рагъэшIынхэмкIэ IэпыIэгъу хъу­гъэ. ЛIыблэнагъэрэ лIыхъужъныгъэрэ зэрихьэзэ, Валерий Заволянскэм пыим инэмыкI уцупIэхэри къыгъотыгъэх, ащ ыкIуачIэ нахь зэрэиныгъэм пайи къымыгъанэу пэуцужьыгъ. УIэгъэ хьы­лъэу ащ къытыращагъэхэм апкъ къикIыкIэ идунай ыхъожьыгъ.

УФ-м и Президентэу Владимир Путиным иунашъокIэ, ипшъэрылъхэр ыгъэцакIэзэ лIыхъужъныгъэу зэрихьагъэм фэшI Валерий Заволянскэр дунаим ехыжьыгъэу «Урысые Федерацием и ЛIыхъужъ» зыфиIорэ цIэр фагъэшъошагъ.

КъумпIыл Мурат ащ янэ-ятэхэм рэзэныгъэ тхылъэу къафагъэшъошагъэр аритыжьыгъ ыкIи ащ ишIэжь Адыгеим зэрэщамыгъэкIодыщтыр къыхигъэщыгъ.

— ШъуикIалэ ыпсэ пэтыфэкIэ пшъэрылъэу дзэ къулыкъум къыфигъэуцугъэр ыгъэцэкIагъ, гущыIэу ытыгъэр къыгъэшъыпкъэ­жьыгъ. ЛIыгъэ хэлъэу под­разделениеу зипащэм хэт дзэкIолIхэм щысэ афэхъу­зэ, пыим пигъэуцужьыгъэх. Ыпсэ хилъхьи дэзэорэ кIалэхэр къыухъумагъэх. КIэлэ лIыхъужъ зэрэжъугъэсагъэм, зэрэшъупIугъэм пае «тхьашъуегъэпсэу» къышъотэIо. Адыгеими Урысыеми ятарихъ Валерий ыцIэ егъашIэм хэтыщт. Тихэгъэгу илIыхъужъхэм ясатыри хэмыкIыжьынэу къыхэнагъ, — къыIуагъ КъумпIыл Мурат ны-ты­хэм зафигъазэзэ.

Къыхэдгъэщын, офицерыр зэрифэшъуашэм тетэу, мы уахътэм янэ-ятэхэмрэ ышыпхъурэ зыщыпсэухэрэ поселкэу Яблоновскэм щагъэтIылъыжьыгъ.

АР-м и ЛIышъхьэ лIы­хъужъым янэ-ятэхэм зэIу­кIэгъоу адыриIагъэм АР-м и Премьер-министрэ иIэ­натIэ зыгъэцакIэрэ КIэрэщэ Анзауррэ АР-м идзэ комиссарэу Александр Аверинымрэ хэлэжьагъэх.

Адыгэ Республикэм и ЛIышъхьэ ипресс-къулыкъу

Сурэтхэр А. Гусевым тырихыгъэх.