АР-м и ЛIышъхьэу КъумпIыл Мурат илъэсыкIэ еджэгъум ипэгъокIэу хы ШIуцIэ Iушъом щыпсэурэ адыгэхэм яса­быеу апэрэ классым чIахьэхэрэм шIухьафтынхэр къафи­шIынхэр хэбзэшIу хъугъэ.

Мары мыгъи ткъош Адыгеим къикIыгъэу къалэу Шъачэ ыкIи ТIопсэ районым яеджапIэхэу тиныдэлъфыбзэу адыгабзэр зыщызэрагъашIэхэрэм ачIэ­хьагъэхэм апае еджэнымкIэ ящыкIэгъэ пстэур зыдэлъ Iалъмэкъхэр къэ­кIуагъэх.

Сабыеу еджапIэм апэрэ лъэбэкъу щызышIыгъэхэм а хъугъэ-шIагъэр шIукIэ агу къинэжьыным фэIорышIэ­хэрэм зэу ащыщ шIухьафтыныр. Адыгеим щыпсэурэ кIэлэцIыкIоу апэрэ классым кIуагъэхэр илъэс къэс ащ тетэу ЛIышъхьэм зэригъэгушIохэрэм имызакъоу, хы ШIуцIэ Iушъом щыIэхэми къызэранэсырэр зэкIэми гуапэ ащэхъу.

КъумпIыл Мурат ипшъэ­рылъкIэ Адыгэ Хасэм ипа­щэу КIакIыхъу Мэджыдэ къуаджэхэу ШэхэкIэишхом, Хьаджыкъо, Агуй Шапсыгъэ ыкIи Псыбэ ягурыт еджапIэхэм Iоныгъом и 1-м мэфэкI линейкэу ащызэхащагъэхэм Iалъмэкъхэр щаритыжьыгъэх. Ащ игъусагъэх мы общественнэ организацием хэтхэу ЛIы­фэ Хъалидэ, Шъхьэлэхъо Сэфэр, Ацумыжъ Айсэ, илъэсыбэ кIэлэегъэджэ Iоф­шIэным езытыгъэхэу, «заслуженнэ» цIэр къызфагъэшъошагъэхэу Алалэ Сэфэррэ Къоджэ Рус­лъанрэ.

— Хы ШIуцIэ Iушъом щыпсэурэ шапсыгъэхэм щыкIагъэу яIэхэм ядэгъэзыжьын Адыгеим ынаIэ лъэшэу къызэрэтетым ишы­хьат мы ямышIыкIэу гъэпсыгъэ шIухьафтынхэр, — къыкIигъэтхъыгъ КIа­кIыхъу Мэджыдэ. — Гъэсэныгъэм игъогу те­хьэгъэ кIэлэцIыкIухэм гуетыныгъэ фыряIэу зэре­джэщтхэм имызакъоу, яны­дэлъфыбзэу адыгабзэр зэрагъэшIэнэу ыкIи шIу алъэгъунэу Адыгэ Рес­публикэм ипащэ афиIорэ гущыIэу мы шIухьафтынхэр тэ тэлъытэ.

НЫБЭ Анзор.