Мыекъопэ къэралыгъо технологическэ университетым мыгъэ чIэхьа­гъэхэм мэфэкI шIыкIэм тетэу Iоныгъом и 1-м афэ­гушIуа­гъэх. Iофтхьабзэм хэлэжьагъэх университетым иректорэу Къуижъ Саидэ, факультетхэм ядеканхэр, проректорхэр ыкIи студенче­скэ активым илIыкIохэр.

Ректорэу Къуижъ Саидэ зэхахьэм къекIолIагъэхэм шIуфэс гущыIэхэмкIэ за­къыфигъэзагъ. Мыгъэ чIэ­хьэгъэ студентхэм, ащ ще­джэхэрэм илъэсыкIэ еджэгъумкIэ къафэгу­шIуагъ ыкIи агу къыгъэкIыжьыгъ Мыекъопэ къэралыгъо тех­нологическэ университетым мурад шъхьаIэу иIэр — зисэнэхьат хэшIыкIы­шхо фызиIэ специалист хъунхэмкIэ амалхэр ятыгъэнхэр, джащ фэдэу кIэ­лэеджа­кIохэм обществэм чанэу зыкъыщагъэлъэгъонымкIэ апшъэрэ еджапIэм истудент объединение ишIуагъэ аригъэкIыныр ары.

Мыгъэ нэбгырэ 600-м ехъу университетым чIэ­хьагъ. Анахь балл ин зиIэу факультет пэпчъ къахэ­фагъэхэм Къуижъ Саидэ нэ­пэеплъ шIухьафтынхэр аритыгъэх.

КъэIогъэн фае, апэрэ курсым исхэмкIэ мыр аужырэ мэфэкIэп. Iоны­гъом и 14-м апэрэ курс хъугъэхэм я Мафэ хагъэу­нэфыкIыщт.

КIэлэеджакIохэр гъогу мафэ техьанхэу, еджэгъэшхо хъунхэу тафэлъаIо!

КIАРЭ Фатим.