Адыгеим илIыкIо куп Геническ иеджапIэхэм ащыIагъ
Адыгэ Республикэм шIэныгъэмрэ гъэсэныгъэмрэкIэ и Министерствэ илIыкIо купэу министрэм игуадзэу Артем Журавель зипащэр Геническ щыIагъ.
Къалэм иколледжитIоу псэолъэшIыныр, фэIо-фэшIэ зэфэшъхьафхэм ягъэцэкIэн епхыгъэ сэнэхьатхэр аIэ къызыщырагъахьэрэр, ащ имастерскойхэр, общежитиехэр ахэм къызэпаплъыхьагъэх. ЕджапIэхэм яфэныкъоныгъэхэм защагъэгъозагъ, ахэм япащэхэмрэ якIэлэегъаджэхэмрэ адэгущыIагъэх.
КолледжитIуми IофшIэнхэр ащыжъотыгъ, унэхэр зэIахыжьыщтыгъэх, Херсон хэкум ис ныбжьыкIэхэу автомеханик, электрогазосварщик, техник-псэолъэшI, электрик, пщэрыхьэкIо, IэшIу-IушIушI сэнэхьатхэр зыIэ къизыгъахьэ зышIоигъохэм ядокументхэр комиссием аIихыщтыгъ.
ЛIыкIо купым Мыекъуапэ къызегъэзэжь нэуж Геническ иколледжхэм ачIэсхэр урысые шапхъэхэм адиштэу еджэнхэмкIэ IэпыIэгъу афэхъунхэу АР-м ипащэхэм рахъухьагъ.
Адыгеим гъэсэныгъэмрэ шIэныгъэмрэкIэ и Министерствэ илIыкIохэр къалэу Геническ игурыт еджэпIитIоу республикэм и ЛIышъхьэу КъумпIыл Мурат тапэкIэ зыдэкIогъагъэм щыIагъэх. Лицееу N 2-р анахьэу зыгъэгумэкIырэр спортзал зэримыIэр ары. ФизкультурэмкIэ урокхэр чIыпIэ щынагъом щарагъэхьых. КъумпIыл Мурат пшъэрылъ зэрафишIыгъэм тетэу джырэ шапхъэхэм адиштэрэ спорт комплекс гурыт еджапIэм щыгъэпсыгъэным иIофыгъо хэплъэх. БэмышIэу гурыт еджапIэу N 3-м ипщэрыхьапIэ чIагъэуцуагъэх Мыекъуапэ ращыгъэ гъэучъыIалъэр, электрическэ хьакуитIур, хьакъу-шыкъухэр ыкIи нэмыкIхэр. Лицеим иIофышIэхэр республикэм и ЛIышъхьэ къызыфелъэIугъэхэр зэкIэ охътэ кIэкIым агъэцэкIагъэх. КIэлэеджакIохэм ягъэшхэнкIэ Iофыгъо гори еджапIэм иIэжьэп.
Адыгеим илIыкIо куп гурыт еджапIэу N 3-м кIэлэегъаджэхэм язэхэсыгъоу щыкIуагъэм хэлэжьагъ, еджэным изэхэщэнкIэ Геническэ районым икIэлэегъаджэхэм IэпыIэгъу зэрафэхъущтхэр араIуагъ.
Людмила Погасеева.