Амброзиер, пшъэдэкIыжьыр
ЦIыфыбэмэ япсауныгъэ зэрар езыхырэ амброзием игъэкIодын илъэс къэс охътабэ тырагъэкIуадэ.
Тызхэт илъэсым Адыгеим ичIыпIэ 85-рэ къызэраплъыхьэгъахэр, пащэхэми цIыфхэми бэрэ зызэраIуагъэкIагъэр, чIыгу гектари 100 фэдиз къакIухьанэу игъо зэрифагъэхэр Адыгэ Республикэм мэкъумэщ хъызмэтымкIэ и Министерствэ испециалистхэм къаIуагъ.
ДэкIыгъо 54-у ашIыгъэм амброзием зэрэпэуцужьынхэ фаер, игъом аупкIэнэу, псэупIэхэми, хатэхэми, губгъохэми ащагъэкIодынэу зэрэщытыр зэрытхэгъэ тхылъи 187-рэ республикэм ичIыпIэ зэфэшъхьафхэм агъэхьыгъэх.
Россельхознадзорымрэ мэкъу-мэщымкIэ Министерствэмрэ яIофышIэхэр зэгъусэхэу ауплъэкIугъэ чIыгу гектари 120-м щыщэу чIыгу Iахь 82-м амброзиер къыщыкIэу къыхагъэщыгъ. Ахэр Джэджэ районым ичIыпIэ 17-мэ, Красногвардейскэ районымкIэ — 11-мэ, Кощхьэблэ районымкIэ — 10-мэ, Шэуджэн районымкIэ — 18-мэ, Теуцожь районымкIэ — 6-мэ, АдыгэкъалэкIэ — 3-мэ, МыекъуапэкIэ — 2-мэ ащыIэх.
Илъэсэу тызхэтым Россельхознадзорым Къыблэ шъолъырымкIэ и ГъэIорышIапIэ Адыгеим имуниципальнэ шъолъырхэм къаратхыкIыгъэу тхылъ 13 къыIукIагъ. Ахэм зэкIэми амброзиер бэу ячIыгухэм къызэращыкIырэр арытхэгъагъ.
УплъэкIунхэм ауж Красногвардейскэ, Тэхъутэмыкъое, Мыекъопэ районхэм ыкIи къалэу Мыекъуапэ амброзием игъэкIодын Iэпэдэлэл ащызышIыгъэхэм хэбзэгъэуцугъэу щыIэхэм къызэраIорэм тетэу пшъэдэкIыжь арагъэхьыщт.