Miray International зыфаIорэ операторэу зэрэдунаеу щызэлъашIэрэм зэхищэхэрэ хы круизхэм джыри зы къахэхъуагъ. Урысыемрэ операторым ипащэхэмрэ зэзэгъыгъэх мы илъэсым тицIыфхэр хы ШIуцIэм тетхэу Тыркуем ащэхэзэ ашIынэу.

Лайнерэу «Астория Гранде» зыфи­Iо­рэр тхьамафэ къэс шэмбэт мафэм Шъачэ икъухьэуцупIэ IокIы, тырку хы­Iушъом пэблэгъэ къалэхэу Стамбул, Чешме, Амасра, Синоп ыкIи Трабзон къащыуцузэ, мэфи 8 зыгъэпсэфакIохэр къырещэкIых. Ар зы мафэ е мэфитIо къалэхэм якъэуцупIэхэм ащэты, цIыфхэм зэрэфаехэу къалэхэр къаплъыхьэх, мэщафэх, чIыпIэ гъэшIэгъонхэр зэрагъэлъэгъух.

Ащ фэдэ зекIо шIыкIэм лъыптыщт уасэм бжыхьэм къыщагъэкIэщт, лайнерым чъэпыогъум нэс зыгъэпсэфакIохэр зэрищэщтых. Илъэси 3 – 11 зыныбжь кIэлэцIыкIухэм ыпкIэ хэмылъэу загъэ­псэфын фитых.

Лайнерыр зэтегъэпсыхьагъ. Ар зыгъэ­IорышIэхэрэри, цIыфхэм яфэIо-фашIэхэр афэзыгъэцакIэхэрэри урысыбзэкIэ мэгущыIэх, зекIохэм агурэIох. Лайнерым бассейн, хьамамэхэр, бархэр, театрэ, джакузи, фитнес-гупчэхэр, нэмыкIхэри хэтых. КIэлэцIыкIухэм клуб зэфэшъхьафхэм яуахътэ ащагъэкIон алъэкIыщт. ЗыгъэпсэфакIохэр мафэ къэс плIэгъогогъо агъашхэх.

«Астория Гранде» апэрэу Шъачэ зыIукIыгъэр мэкъуогъум иапэрэ мафэр ары. А шIыкIэм тетэу зызыгъэпсэфынэу фаехэм япчъагъэ къыхэхъо. Круизым езыгъэнэцIыхэрэм зэу ащыщ визэ уимы­Iэу IэкIыб хэгъэгухэм уарыхьан зэрэплъэкIыщтыр. ЧъыIэр къэмысызэ ыкIи къухьэлъатэхэр IэкIыб хэгъэгухэм зэрамыгъэбыбыжьхэрэм къыхэкIэу мэшIоку гъогухэмкIэ ыкIи хым тетхэу зыгъэпсэфакIо кIощтхэр нахьыбэ зэрэхъущтхэр гъэнэфагъэ. (Тикорр.).