Республикэм игурыт еджапIэхэм шIэныгъэм и Мафэ фэгъэхьыгъэ линейкэхэр тыгъуасэ ащыкIуагъэх.

Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур Мыекъуапэ игимназиеу N 22-м щыIагъ, ащ икIэлэеджакIохэм афэгушIуагъ.

Джащ фэдэу Iофтхьабзэм хэлэжьагъэх Мыекъуапэ имэрэу Геннадий Митрофановыр, хэбзэ къулыкъухэм ялIыкIохэр, ны-тыхэр.

Шъугу къэтэгъэкIыжьы «Единэ Россием» ипартийнэ проектэу «Гурыт еджэпIакI» зыфиIорэм диштэу Мыекъопэ гимназиеу N 22-м мыгъэ гъэцэкIэжьынхэр зэрэщыкIуагъэхэр, мылъкукIи, техникэкIи ар нахь зэрэзэтырагъэпсыхьагъэр. КIэлэеджэкIо 1400-мэ илъэсыкIэ еджэгъур джырэ шапхъэхэм адиштэрэ гурыт еджапIэм щырагъэ­жьэжьыщт. Ахэм ащыщэу нэ­бгыри 135-р апэрэ классхэм арыхьагъэх.

КIэрэщэ Анзаур МэфэкI Iоф­тхьабзэм хэлажьэхэрэм шIуфэс къарихи, кIэлэцIыкIухэм яегъэ­джэнкIэ ищыкIэгъэ пстэур гимназием непэ зэриIэр къыIуагъ.

«ТапэкIи гимназием хэхъоныгъэ ышIынымкIэ IэпыIэгъу тыфэхъущт. Республикэм иеджа­пIэхэр джырэ шапхъэхэм ади­штэнхэмкIэ, шIэныгъэ куу кIэлэ­еджакIохэм ягъэгъотыгъэнымкIэ ищыкIагъэр зэкIэ тшIэщт. Мы илъэсым Iоныгъом и 1-м ехъулIэу гурыт еджэпIи 8 агъэ­цэкIэжьыгъ. Мы илъэси 4 благъэм республикэм игурыт еджапIэхэр зэкIэ зэтедгъэ­псы­хьажьыщтых. Ащ фэдэ амал къеты гурыт еджапIэхэм ягъэцэкIэжьын телъытэгъэ федеральнэ программэу хэгъэгум и Президент кIэщакIо зыфэхъу­гъэм. Ащ ишIуагъэкIэ гурыт еджапIэхэр агъэкIэжьыщтых, кIэлэегъаджэхэми яIэпэIэсэ­ныгъэ зыкъырагъэIэтыщт», — къыIуагъ АР-м и Премьер-­ми­нистрэ ипшъэрылъхэр зы­гъэцакIэрэм.

Министрэхэм я Кабинет ипащэ ипшъэрылъхэр зыгъэцакIэрэм къызэрэхигъэщыгъэмкIэ, гурыт еджэпIакIэхэм яшIын рес­публикэм щылъагъэкIуатэ, илъэ­ситфым къыкIоцI гурыт еджэпIи 5 агъэпсыгъ. Тэхъутэмыкъое районым еджэпIи 3 мыгъэ щашIы.

«ТэркIэ анахьэу мэхьанэ зи­Iэр Адыгеим икIэлэеджэкIо пстэуми гъэсэныгъэ дэгъу ягъэ­гъотыгъэныр ары. Ау зиIоф хэшIыкIышхо фызиIэ кIэлэегъа­джэхэр щымыIэхэу ащ фэдэ пшъэрылъыр зэшIопхын плъэ­кIыщтэп. КIэлэегъэджэ IэпэIэсабэ республикэм ис. ТикIэлэ­еджакIохэм олимпиадэ, зэнэ­къокъу зэфэшъхьафхэм гъэ­хъагъэу ащашIыхэрэм ар къаушыхьаты. ЕджапIэхэм ащыщхэм кIэлэегъаджэхэр щафикъу­хэрэп, мы Iофыгъом изэшIохын джыдэдэм ыуж тит. Къэралыгъо программэу «Къоджэ кIэлэегъадж» зыфиIорэм диштэу къуаджэхэм адэт гурыт еджапIэхэм Iоф ащашIэнэу кIэлэ­егъэджэ 12 агъэкIуагъ. ТапэкIи мы лъэныкъом тишъыпкъэу Iоф дэтшIэщт ящыкIэгъэ пстэур якIэлэцIыкIухэм гурыт еджапIэм зэрэщагъотырэр ны-тыхэм нэ­рылъэгъу къафэхъуным пае», — къыIуагъ КIэрэщэ Анзаур.

АР-м и Премьер министрэ ипшъэрылъхэр зыгъэцакIэрэр апэрэ классхэм арыхьагъэхэм афэгушIуагъ. КIэлэцIыкIу мини 6,5-рэ фэдиз мыгъэ апэрэ классым чIэхьагъ.

«Апэрэ классым ихьагъэхэм ясэIо дэгъоу еджэнхэу, якIэлэ­егъаджэхэм ядэIунхэу. Апшъэрэ классхэм арысхэм еджэным гъэхъэгъэшхохэр щашIынэу, ящы­Iэныгъэ зэрапхыщт сэнэхьатыр тэрэзэу къыхахынэу, ушэтынхэр дэгъоу атынэу сафэ­лъаIо! Мы гимназиеми, рес­публикэм инэмыкI еджапIэхэми ачIэсхэм еджэнымкIэ гъэхъа­гъэхэр ашIынэу, оценкэ дэгъу­хэр къахьынэу афэсэIо! Ны-тыхэм сафэлъаIо ягъэхъагъэ­хэмкIэ якIэлэцIыкIухэм ренэу агъэгушIонхэу. Ныбджэгъу лъапIэхэр! Джыри зэ илъэсыкIэ еджэгъур зэрежъугъэжьэжьы­гъэмкIэ сышъуфэгушIо! Гъогу мафэ шъутехь!» — къыIуагъ КIэрэщэ Анзаур.

АР-м и ЛIышъхьэ ипресс-къулыкъу