«Къоджэ ипотекэм» фэгъэхьыгъэ къэралыгъо программэр цIыфхэм псэукIэ амалэу яIэр нахьышIу шIыгъэным тегъэ­псыхьагъэхэм зэу ащыщ.

Къоджэ псэупIэм, нэ­бгырэ мин 30 нахьыбэ зыдэмыс къэлэ цIыкIухэм ащыпсэухэрэм е кIожьынэу изыхъухьагъэхэм унэ къащэфыщтмэ, кIэу ашIыщтмэ мыр IэпыIэгъушхо афэхъущт. Программэм къызэрэщыдэлъытагъэмкIэ, процентэу пылъыр 0,1-м щегъэжьагъэу 3-м нэсы, чIыфэр къызэра­тыщт пIалъэр илъэс 25-рэ фэдиз. Унагъом унэр къы­щэфыным пае ищыкIэ­гъэщт ахъщэм ипроценти 10 егъэжьэпIэ взносэу хилъхьан фаеу программэм къыщеIо.

ЧIыфэу банкым къы­тыщтыр анахьыбэу сомэ миллиони 3, ау Ямало-­Ненецкэ ыкIи Ленинградскэ хэкухэм, КъокIыпIэ Чыжьэ Федеральнэ шъо­лъырым ащыпсэухэрэм сомэ миллиони 5 афагъэ­нэфагъ, Москва, Московскэ хэкур ыкIи Санкт-Петербург къыхиубытэхэрэп.

Мы программэм илъэсэу тызхэтым ипIалъэ ыухынэу ары зэрэщытыгъэр. Джы УФ-м и Правительствэ и Тхьаматэу Михаил Мишустиным къы­зэриIуагъэмкIэ, пIэлъэ гъэ­нэфагъэ имыIэжьэу ар къэралыгъом лъигъэкIо­тэщт.

— Къоджэ щыIакIэр нахьышIоу къыхэзыхы­гъэхэм игъо имыфэнхэм темыщыныхьэхэу банкым чIыфэ къыIахынышъ, унэ къащэфын е кIэу ашIын алъэкIыщт, — къыIуагъ Премьер-министрэм.

Шъугу къэдгъэкIыжьын, фэгъэкIотэнхэр къызщы­дэлъытэгъэ кредитхэм афэгъэхьыгъэу программиплI Урысыем мы уахътэм щыпхыращы. «Къоджэ ипотекэм» имызакъоу, КъокIыпIэ Чыжьэм щы­псэухэрэм апае «Дальневосточная» зыфиIорэр, «Унэгъо ипотекэр» ыкIи «Льготнэ ипотекэр» щыIэх.

Правительствэм ипащэ къызэриIуагъэмкIэ, «Льготнэ ипотекэм» фэгъэхьыгъэм цIыфым подрядчи­кым зэзэгъыныгъэ димы­шIэу унэе псэупIэ ыгъэуцун амал етыгъэнэу къыщыдэлъытэгъэщт. Про­центхэр 7-м шIокIыщтхэп, къалэхэу Москва, Санкт-Петербург, Московскэ ыкIи Ленинградскэ хэкухэм ащыпсэухэрэм сомэ миллиони 7-м нэсэу кредит къаIахын алъэ­кIыщт, нэмыкI субъектхэм сомэ миллиони 6-м шIомыкIэу къаратыщт.