Непэ Урысыем исубъект пстэумэ афэдэу Адыгеим илъэсыкIэ еджэ­гъур щырагъэжьэжьы. КIэлэеджэкIо мин 61,6-рэ республикэм иеджапIэхэм къякIолIагъ. Ахэм ащыщэу кIэлэцIыкIу мини 6,7-р апэрэ классым чIахьэ.

АР-м гъэсэныгъэмрэ шIэ­ныгъэмрэкIэ и Министерствэ къызэритыгъэмкIэ, республикэм иеджапIэхэр зэкIэ илъэсыкIэ еджэгъум фэхьазырых, гъэцэ­кIэжьын IофшIэнхэр зыщыкIощтыгъэхэм игъом ахэр аухыхи, япчъэхэр къызэIуахыжьыгъэх.

Урысые политическэ партиеу «Единэ Россиер» кIэщакIо фэ­хъуи, УФ-м и Президентэу Вла­димир Путиным къыдыри­гъэштагъэу гурыт еджапIэхэр лъэхъаным къыздихьыгъэ шапхъэхэм адиштэу зэтегъэпсы­хьэгъэнхэм фэгъэхьыгъэ программэр мыгъэ атIупщыгъ.

Ащ Адыгеир зэрэхэуцуагъэм ишIуагъэкIэ, сомэ мил­лион 600 фэдиз къыфатIупщи къалэу Мые­къуапэ, Мыекъопэ, Шэу­джэн ыкIи Красногвардейскэ районхэм ягурыт еджапIэхэу 8 агъэ­цэкIэжьыгъ. Джащ фэдэу къоджэ псэупIэхэм хэхъоныгъэ ягъэшIыгъэным фэгъэхьыгъэ къэралыгъо программэм къыдыхэлъытагъэу Шэуджэн районым зы еджапIэ щагъэкIэ­жьыгъ.

Ащ имызакъоу, мыгъэ спортзал 12 агъэцэкIэжьыгъ, Мые­къуапэ иеджапIэу N 22-м, Кощ­хьэблэ районымкIэ къуа­джэу Блащэпсынэ дэт еджапIэм яща­гухэм «спортивнэ площадкэ Iушхэр» ащагъэпсыгъэх.

ИлъэситIукIэ узэкIэIэбэжьмэ зэпахырэ узэу дунаир зэлъызы­кIугъэм зэхъокIыныгъабэ щыIэныгъэм къыхилъхьагъ.

Ахэм зэу ащыщ мэфэкI линейкэу непэ фэдэ мафэм еджапIэхэм ащызэхащэхэрэм зэкIэ кIэлэеджакIохэр зэрахэмыла­жьэрэр. Мыгъи апэрэ классым къэкIорэ кIэлэцIыкIухэмрэ я 11-м ихьагъэхэмрэ ар зыфы­зэхащагъэр.

Санитар шапхъэхэр шIокI имыIэу агъэцэкIэнхэм еджапIэхэм анаIэ тетыщт, ау очнэ шIыкIэм тетэу еджэнхэ гухэлъ яI, зыпари пэрыохъу къафэмыхъунэу мэгугъэх.

МафэкIэ илъэсыкIэ еджэгъур рагъэжьэжьынэу тафэлъаIо!

ХЪУТ Нэфсэт. Сурэтыр тигъэзет ихъарзы­нэщ къыхэтхыгъ.