Адыгэ Республикэм и Мафэ ихэгъэунэфыкIын фэгъэ­зэ­гъэ зэхэщэкIо комитетым изэхэсыгъо АР-м и Прави­тельствэ зычIэт унэм тыгъуасэ щыкIуагъ.

Адыгеим и ЛIышъхьэу КъумпIыл Мурат ар зэрищагъ. Зэхэсыгъом хэлэ­жьагъэх АР-м и Къэра­лыгъо Совет — Хасэм и Тхьаматэу Владимир Нарожнэр, министерствэхэм, ведомствэхэм, муниципальнэ образованиехэм япащэхэр.

Зэхэсыгъор къызэIуих­зэ, АР-м и ЛIышъхьэ къы­хигъэщыгъ 2022-рэ илъэсыр республикэм июбилей иилъэсэу зэрэщытыр. МэфэкI Iофтхьабзэ­хэр Адыгеим ия 100-рэ илъэс, республикэр зы­зэхащагъэр илъэс 31-рэ зэрэхъурэм афэгъэхьы­гъэщтых. Республикэм щы­­псэухэрэри ихьакIэхэри ахэм ахэлэжьэщтых.

«МэфэкIыр лъэгэпIэ­шхом тетэу зэхэщэгъэнымкIэ лъэныкъо пстэури къыдэшъулъыт. Iофтхьабзэ пэпчъ цIыфхэм агу рихьын фае. Общественнэ гъэ­шхэным пылъ организациехэр, транспорт организациехэр къызфэжъу­гъэфедэх хэлажьэхэрэм мэфэкIыр агу къинэжьыным пае. Общественнэ чIыпIэхэм язэтегъэпсы­хьани шъунаIэ тежъугъэт. Щынэгъончъэным епхыгъэ Iофыгъохэми гъунэ алъышъуф», — къыIуагъ КъумпIыл Мурат.

Чъэпыогъум и 1-м къы­щегъэжьагъэу и 5-м нэс цIыфхэр жъугъэу зыхэлэжьэщтхэ Iофтхьэбзэ шъхьаIэхэр щыIэщтых. Республикэм имуниципальнэ образованиехэм ахэр ащыкIощтых, Мые­къуапэ ичIыпIэ зэфэ­шъхьафхэми Iофтхьэбзэ жъугъэхэр ащызэхащэщтых. Урысые Федера­циемрэ Адыгэ Респуб­ли­кэмрэ якъэралыгъо тын­хэр аратыщтых, мэфэкI зэIукIэр, концертыр, ­куль­турэ Iофтхьабзэхэр, лъэпкъ Iэпэщысэхэм якъэ­гъэлъэгъонхэр, шыгъачъэ­хэр зэхащэщтых. Лазернэ шоуи зэхащэнэу рахъухьэ.

ОрэдыIоу Сосо Пав­лиашвили, 5sta Family купыр, республикэми, ащ къыпэгъунэгъу шъолъыр­хэми яартист цIэрыIохэмрэ ятворческэ коллективхэмрэ зыхэлэжьэщтхэ мэфэкI концертыр чъэпыогъум и 5-м ипчыхьэ республикэ стадионым къыщатыщт. МэшIоустхъо­кIэ мэфэкIыр аухыщт.

Чъэпыогъум и 4 — 5-м Адыгеим щыпсэурэ лъэпкъ­хэм якультурэ ифестиваль Лениным ипчэгу щыкIощт, лъэпкъ Iэпэщы­сэхэм якъэгъэлъэгъони ащ къыщызэIуахыщт.

Юбилей Iофтхьабзэхэм къадыхэлъытагъэу дунэе мэхьанэ зиIэ культурэ IофтхьэбзэшхуитIу зэра­хьащт: чъэпыогъум и 2-м къыщегъэжьагъэу и 4-м нэс адыгэ культурэм ифестиваль, Iоныгъом и 30-м къыщегъэжьагъэу чъэпыогъум и 3-м нэс адыгэ пшъашъэм ифестиваль щыIэщт. Дунэе Iофтхьа­бзэу «Лъэпкъ мэкъэмэ Iэмэ-псымэхэм къязыгъэ­Iорэ нэбгыри 100» зыфиIорэр Лениным ипчэгу щызэхащэщт. Лъэпкъ шъуа­­шэхэмрэ пэсэрэ ­адыгэ лъэпкъ мэкъэмэ Iэмэ-псымэхэмрэ ащ къы­щагъэлъэгъощтых, мастер-шооу «ДжэгуакIу» зыфиIорэри щызэхащэщт. Республикэм илъэпкъ­-культурэ объединениехэм ялIыкIохэр ахэм ахэлэ­жьэщтых.

Шыгъачъэ зэрэщыIэщтым нэмыкIэу, УФ-м кушъхьэфэчъэ спортымкIэ ичемпионат, кушъхьэфа­чъэмкIэ дунэе зэнэкъо­къур, шъхьафит бэнакIэмкIэ Урысыем и Кубок икъыдэхын тегъэпсыхьэгъэ зэнэкъокъур, щэрыонымкIэ зэнэкъокъу шъхьэихыгъэр щыIэщтых.

Общественнэ чIыпIэхэм язэтегъэпсыхьан лъэшэу анаIэ тырагъэтын зэрэ­фаер зэхэщэкIо комитетым изэхэсыгъо къыща­Iуагъ. Культурэ проектэу «Достояние республики» зыфиIорэм диштэу Адыгеим ия 100-рэ илъэс итамыгъэ зытетыщт троллейбусыр Мыекъуапэ щызекIощт. Къалэм ичIыпIэ зэфэшъхьафхэм интерактивнэ площадкэхэр къащызэIуахыщтых. «Мэз­дахэ» идэкIояпIэ, къэлэ паркым адэжь, микрорайонэу Восходым концертхэр къызыщатыщт чIыпIэ­хэр ащызэтырагъэпсы­хьащтых.

АР-м и ЛIышъхьэ муниципальнэ образованиехэм япащэхэм пшъэрылъ афишIыгъ мэфэкIыр агу къинэжьэу республикэм ипсэупIэ пэпчъ щыхагъэу­нэфыкIынэу.

«Республикэм ия 100-рэ илъэс фэгъэхьыгъэ Iофтхьэбзабэ мыгъэ джыри зэрахьащт. Чъэпы-огъум и 5-м ахэр ухыгъэ хъущтхэп. Тематическэ Iофтхьабзэхэр, Урысыемрэ республикэмрэ яартистхэр къызэжъугъэблэгъэщтхэ концертхэр тапэкIи зэрэзэхэшъущэщтхэм шъуягупшыс. Ау юбилей илъэсыр дахэу ухыгъэным пае тыдэрэ лъэныкъуи апэрэ чэзыоу план­хэр щыгъэцэкIэгъэнхэ фае. Iофэу зэшIотхын фаер бэ, социальнэ-экономикэ пшъэрылъхэм ягъэцэкIэн кIуачIэу шъуиIэр ешъухьылI. МыщкIэ мэхьанэшхо иI цIыф пэ­рытхэу псэупIэхэм яхэ­хъоныгъэ зиIахьышIу хэзышIыхьагъэхэм, якъо­джэгъухэмкIэ щысэтехыпIэу щытхэм ящытхъу шъуIоным», — къыIуагъ КъумпIыл Мурат.

Адыгэ Республикэм ия 100-рэ илъэс фэгъэхьыгъэ мэфэкI концертэу Iоны­гъом и 21-м Москва и Къэралыгъо Кремлевскэ дворец щыкIощтым изэ­хэщэнкIэ пшъэрылъ заули АР-м и ЛIышъхьэ афи­шIыгъ. Адыгэ Республикэм и ЛIышъхьэ ипресс-къулыкъу