Хэдзынхэр зэрэкIохэрэм лъыплъэщт федеральнэ, шъолъыр ситуацион­нэ гупчэхэр «Единэ Россием» къызэIуихыгъэх.

Чэщи мафи ямыIэу ахэм Iоф ащызышIэщт юристхэм мэкъэтыныр зэрэкIорэм гъунэ лъафыщт, хэукъоныгъэхэр зэрашIыгъэхэм афэгъэхьыгъэ тхылъэу къаIэкIахьэхэрэр зэхафыщтых, ахэм правовой уасэ къаратыщт.

Партием и Генеральнэ совет исекретарь игуадзэу Сергей Перминовым зэрэхигъэунэфыкIыгъэмкIэ, «Единэ Россием» пшъэрылъ шъхьаIэу иIэр хэбзэу­къоныгъэхэр къыхэмыфэхэу хэ­дзынхэр зэхэщэгъэнхэр ары.

«ПэшIорыгъэшъэу къыхэт­хыгъэ кандидатхэм 2022-рэ илъэ­сым тымакъэ афэтты зэ­хъуми хабзэхэм тадэхыгъэп. Типолитическэ оппонентхэми тыкъя­джэ­гъагъ тэщ фэдэу зе­кIонхэу. Тихэгъэгу ишъолъыри 5-мэ пэ­шIорыгъэшъ мэкъэтыныр непэ ащырагъэжьэщт», — къыIуагъ ащ.

Сергей Перминовым агу къыгъэкIыжьыгъ шъыпкъагъэр ылъапсэу хэдзынхэр зэхэщэ­гъэнхэмкIэ «Единэ Россием» Общественнэ палатэм илIыкIо­хэми, политическэ партие 15-ми тапэкIэ Iуагъэ зэради­шIы­гъагъэр.

«Тихэгъэгу, хэдзын, полити­ческэ системэм, типартие информационнэу, технологическэу лъэшэу къызыщытеIункIэхэрэ лъэхъаным хэдзынхэр зэрэ­кIохэрэр зыщыдгъэгъупшэ хъущтэп, тэри хэдзынхэм алъы­плъэхэрэми типшъэрылъыр ха­бзэр амыукъоным гъунэ лъы­тфыныр, тикандидатхэр зафэу текIонхэм тыдэлэжьэныр ары», — хигъэунэфыкIыгъ ащ.

Партием и Генеральнэ совет исекретарь игуадзэ къызэрэхигъэщыгъэмкIэ, ситуационнэ гупчэхэм пшъэрылъэу яIэр Iофхэр псынкIэу, зафэу зэхафынхэр ары.

«Непэрэ мафэм зыфэдгъэ­хьазырыгъ: хэдзынхэм алъы­плъэщтхэр дгъэсагъэх, федеральнэ тренировкэхэр зэхэт­щагъэх», — къыIуагъ Сергей Пер­миновым.

Партиеу «Единэ Россием» и РИК ипащэу, Мыекъуапэ идепутатэу АфэшIэгъо Рэмэзан къызэриIуагъэмкIэ, Адыгеим иситуационнэ гупчэ Iоф ышIэу ригъэжьагъ.

«Iоныгъом и 9-м къыще­гъэжьагъэу и 11-м нэс хэ­дзынхэр кIощтых. Хэдзын Iоф­тхьэбзэ 43-рэ Адыгеим щызэрахьащт. Тэхъутэмыкъое рай­онымкIэ зы мандат зиIэ хэдзыпIэ коеу N 21-м АР-м и Къэралыгъо Совет — Хасэм идепутат ихэдзын тедзэ щыкIощт. Джащ фэдэу депутатхэр муниципальнэ райони 7-мэ, Адыгэ­къалэ, псэупIэ 34-мэ ащыха­дзыщтых», — къыIуагъ АфэшIэгъо Рэмэзан.

Iоныгъом и 9 — 11-м УФ-м ишъолъыр 82-мэ хэдзын Iоф­тхьабзэхэр зэращыкIощтхэр шъугу къэтэгъэкIыжьы. Шъо­лъырхэм яхэбзэгъэуцу зэIу­кIэ­хэм, къэлэ думэхэм, чIыпIэ зы­гъэIорышIэжьынымкIэ къулыкъухэм ахэтыщтхэр хадзыщтых. Джащ фэдэу губернаторхэм яхэдзынкIэ Iофтхьэбзэ 15 зэрахьащт, апшъэрэ IэнатIэхэм аIугъэхьэгъэнхэу «Единэ Россием» кандидат 13 къыгъэлъэгъуагъ.