Iофтхьабзэу «КIэлэцIыкIур еджапIэм фэгъэхьазыр» зыфиIорэм ха­хьэу Урысыем, Луганскэ ыкIи Донецкэ народнэ республикэхэм, джащ фэдэу шъхьафит ашIыжьыгъэ чIыпIэхэм ащыпсэурэ кIэлэцIыкIу мин 200 фэдизмэ канцеляр пкъыгъохэр, еджапIэм щащыгъыщт ыкIи спортивнэ формэхэр, лъэкъопылъхьэхэр, Iалъмэкъхэр, планшетхэр аIэкIагъэхьагъэх.

«Мыгъэ мы Iофтхьабзэм изэхэщэн мэхьанэшхо иIэ хъугъэ. Ны-тыхэм ыкIи кIэлэцIыкIухэм нахьыбэу тишIуагъэ ядгъэкIыным фэшI Донбасс ыкIи шъхьафит ашIыжьыгъэ чIыпIэхэм Iофтхьабзэр ащылъыдгъэ-­кIотэнэу мурад тшIыгъэ. КIэлэцIыкIухэм ящыкIэгъэ хьап-щып­хэм ыкIи щыгъынхэм якъэу­гъоинкIэ мы Iофтхьабзэм чанэу къыхэлэжьагъэхэм ащыщых Татарстан, Карелиер, Костромской ыкIи Кемеровскэ хэкухэр, Адыгэ Республикэр», — къыIуагъ партпроектэу «Новая школа» зы­фиIорэм икоординаторэу, Къэ­ралыгъо Думэм икомитет итхьаматэ иапэрэ гуадзэу Але­на Аршиновам.

Ащ къызэриIуагъэмкIэ, партийнэ Iофтхьабзэу «ЕджапIэхэм IэпыIэгъу афэхъугъэныр» зыфиIорэм хахьэу гъэсэныгъэ уч­реждение мини 6,5-мэ яшIуа­гъэ арагъэкIыгъ. Партиеу «Еди­нэ Россием» иIэпыIэгъукэ ка­бинетхэм гъэцэкIэжьын цIы-кIу­хэр арашIылIагъ, партием иактивистхэм еджапIэхэм ящагухэр аукъэбзыгъэх, чъыгхэр агъэтIысхьагъэх.

«Терроризмэм ыкIи машIом ащызыухъумэрэ пкъыгъохэр еджапIэхэм ачIэдгъэуцуагъэх, зэреджэщтхэ тхылъхэр ыкIи художественнэ литературэр афэтщэфыгъ, актовэ ыкIи спортивнэ залхэм ащагъэфедэщт пкъыгъохэр, Iэмэ-псымэхэр, кIэ­лэцIыкIу театрэхэм ящыкIэгъэ декорациехэр афэдгъэуцугъэх», — еIо Алена Аршиновам.

Илъэс къэс зэхащэрэ урысые Iофтхьабзэу «Родительская приемка» зыфиIорэм хахьэу еджапIэхэм гъэцэкIэжьынэу ара­шIылIагъэхэм язытет ауплъэ­кIугъ. «Единэ Россием» идепутатхэм шъолъыр отделением исекретарьхэр, гъэсэныгъэм ылъэныкъокIэ чIыпIэ зыгъэIорышIэжьын къулыкъухэр ягъу­сэу, джащ фэдэу ны-тыхэм яко­митетхэм ялIыкIохэм ыкIи лъыплъэн органхэм еджапIэхэр илъэсыкIэ еджэгъум зэрэфэ­хьазырхэр ауплъэкIугъэх.

— Нахьыбэу анаIэ зытырагъэтыгъэр еджапIэхэм гъэцэ­кIэжьын IофшIэнхэр зэращы­кIуагъэхэр, санитарнэ-гигиеническэ шапхъэхэр зэрагъэцэкIагъэхэр, машIом ыкIи терроризмэм апэшIуекIорэ Iофтхьабзэхэм язэхэщэн ары. Гъэсэныгъэм иучреждениехэр илъэсыкIэ еджэгъум зэрэфэхьазыр­хэм зыщагъэгъозагъ ны-ты нэ­бгырэ мин 12 фэдизмэ. Ыпэ­кIэ зигугъу къытшIыгъэ шап­хъэхэр икъоу гъэцэкIагъэ хъугъэхэмэ ахэм ауплъэкIугъ, — къыIуагъ. А. Аршиновам.

Адыгеир пштэмэ, апэрэ классым кIощтхэм апае шIухьафтынхэр агъэхьазырыгъэх. Мы илъэсым ахэм япчъагъэ мини 7 мэхъу. Iалъмэкъхэм канцеляр пкъыгъохэм ыкIи дневникым анэмыкIэу нэфынэр къэзытырэ ныбалъэхэр ыкIи шъолъырым изэгъэшIэн фытегъэпсыхьэгъэ пособие зэфэшъхьафхэу «Моя Адыгея» зыфиIорэр адэлъыщтых. Адыгеим и ЛIышъхьэу, партиеу «Единэ Россием» ишъо­лъыр къутамэ и Секретарэу КъумпIыл Мурат ипшъэрылъкIэ мы илъэсым Iофтхьабзэм къыхиубытэхэрэм зарагъэушъомбгъущт. ШIухьафтынхэр респуб­ликэм икIэлэеджакIохэм анэмыкIэу, Херсон хэкум и Геническэ район ис кIэлэцIыкIухэми атырагощэщтых.