Херсон икIэлэцIыкIухэм апае шIухьафтынхэр афашIыгъэх
Адыгэ Республикэм и ЛIышъхьэу КъумпIыл Мурат ыцIэкIэ Геническэ районым щыпсэурэ кIэлэеджэкIо 700-мэ Iалъмэкъхэр афащагъэх.
Шъо зэфэшъхьафхэр зиIэ ыкIи гъэкIэрэкIэгъэ Iалъмэкъхэу Адыгеим къэралыгъо гъэпсыкIэ зиIэр илъэси 100 зэрэхъугъэм иэмблемэ зытетхэр апэрэ классым ихьащт кIэлэцIыкIухэм атырагощэнхэу щытыгъ. Ау Iофхэм язытет зэблэхъугъэ хъугъэ. Херсон хэкум и Правительствэ еджапIэм чIэхьащт кIэлэеджакIохэм пэшIорыгъэшъэу Iалъмэкъхэр аIэкIигъэхьагъэх. АщкIэ IэпыIэгъу къафэхъугъэр политическэ партиеу «Единэ Россиер» ары. Ащ къыхэкIыкIэ Адыгеим къыгъэхьазырыгъэ шIухьафтынхэр гъот макIэ ыкIи сабыибэ зэрыс унагъохэм аратынхэу рахъухьагъ.
Iалъмэкъ пэпчъ кIэлэеджакIом ищыкIэгъэщт пкъыгъохэр дэлъых. Ау кIэлэцIыкIухэр ыкIи ны-тыхэр анахьэу зыщыгушIукIыхэрэр Урысыем ибыракъ зытет дневникыр ары. Мыщ фэдэ дневник Херсон хэкум ибгъотэщтэп. Джы апэрэ классым ихьэгъэ кIэлэеджэкIо цIыкIухэр дэгъоу еджэнхэм, шIэныгъэ куухэр зэрагъэгъотынхэм мэхьанэшхо иI, ащкIэ ящыкIагъэр зэкIэ аIэкIэлъ.
Селоу Азовскэм щыпсэурэ Рыжовхэм яунагъо щапIугъэ сабыиплIым аныбжь икъуи, зэбгырыкIыгъэх. Илъэси 10-м къехъугъэу лъэпкъ зэфэшъхьафхэм ащыщ кIэлэцIыкIухэр къаIахыгъэхэу зэшъхьэгъусэхэм зэдапIух. Непэрэ мафэм ехъулIэу ахэр нэбгырибл мэхъух — илъэси 8-м щегъэжьагъэу 12-м нэс аныбжь. Адыгеим къикIыгъэ шIухьафтынхэм зэкIэри игъэгушIуагъэх.
— Украинэм пособиехэр къытитыжьырэп, Урысыем ахъщэ IэпыIэгъур къытIэкIигъэхьанымкIэ ищыкIэгъэ тхьапэхэр дгъэхьазырынхэу игъо тифагъэп, — къеIуатэ Наталья Рыжовам. — Непэ IэпыIэгъу шъукъызэрэтфэхъурэм тэркIэ мэхьанэшхо иI. ЧIыгум тыщэлажьэ, хъызмэтшIапIэ тIыгъ, ау сабыибэ зэрыс унагъом ищыкIагъэр бэдэд, анахьэу илъэсыкIэ еджэгъум ехъулIэу. Джы тисабыйхэр еджэным зэрэфэхьазырхэр теубытагъэ хэлъэу къэтIон тлъэкIыщт.
Рыжовхэр зыщыпсэурэ унэм ищагу дэхэ дэдэу зэтегъэпсыхьагъ, къабзэ, къэгъагъэхэр къыщэкIых. Унэгъо зэгурыIожьым ис сабыйхэм якъэралыгъо шIу алъэгъоу къызэрэтэджыщтхэм щэч хэлъэп.