Гериатрическэ гупчэ къызэIуахыгъ
Мыекъопэ къэлэ клиническэ сымэджэщым республикэ гериатрическэ (зыныбжь хэкIотагъэхэм зыщяIэзэхэрэ чIыпIэ) гупчэ шышъхьэIум и 29-м къыщызэIуахыгъ.
Адыгэ Республикэм псауныгъэм икъэухъумэнкIэ иминистрэ зэрэхигъэунэфыкIыгъэмкIэ, гупчэм амбулаторнэ кабинетэу сымаджэхэр къызэкIуалIэхэрэр хэт. ХэушъхьафыкIыгъэ отделениеу уахътэм диштэрэ оборудованиер зычIагъэуцуагъэм специалист IэпэIасэхэм Iоф щашIэщт. Гупчэм ипащэр АР-м псауныгъэм икъэухъумэнкIэ и Министерствэ испециалист-гериатор шъхьаIэу Олег Владимирович Пчелинцевыр ары.
Гериатрическэ IэпыIэгъур цIыфхэм арагъэгъотынымкIэ зишIуагъэ къэкIуагъэхэм ащыщых лъэпкъ проектхэу «Демографиер» ыкIи «Псауныгъ» зыфаIохэрэр. ТапэкIэ къулыкъукIэм зырагъэушъомбгъунэу щыт. Муниципалитетхэм ясымэджэщхэм кабинетыкIэхэр къащызэIуахыщтых, ящыкIэгъэ оборудованиер аIэкIагъэхьащт, ахэм Iоф ащызышIэщт врачхэм ахагъэхъощт. Илъэсым иапэрэ мэзих къызэригъэлъэгъуагъэмкIэ, зы-ныбжь илъэс 60-м ехъугъэ сымэджи 192-мэ IэпыIэгъу арагъэгъотыгъ. (Тикорр.).