Тызхэт илъэсым ызыныкъо пэкIыфэ Адыгеим щыпсэурэ цIыфхэм ащыщхэм гъэпцIакIохэм якарточкэхэм сомэ миллион 50-м ехъу афырагъэхьагъ.

Пчъагъэр нахьыбэн ылъэ­кIыщт, сыда пIомэ зиахъщэ амышIэрэ цIыфхэм язытыгъэу полицием е хьыкумым Iофыр анэзымыгъэсыгъэр макIэп, ямылъку къыгъэзэжьыным щыгугъыхэрэп.

Нэбгырэ 377-у зиахъщэ зы­шIокIодыгъэхэм нахьыбэу ахэтых Мыекъуапэ щыпсэухэрэр, етIанэ Мыекъопэ, Тэхъутэмыкъое, нэмыкI районхэм ащыIэхэр ары. Ахэм ягугъу гъэзетхэм ренэу къашIых, телевидениемкIэ къагъэлъагъох, ау цIыфхэр ахъщэм кIэмыгушIунхэ алъэкIырэп, къахахъоу аIозэ, аугъоигъэ щыIэмэ, аIэкIэкIы.

Инвестициехэр бэу къыфэ­кIонхэу гурагъаIуи, сомэ мин 700 къэлэдэсхэм ащыщ Iахыгъ, зы соми ыгъотыжьыгъэп. Къу­хьэлъатэм зэритIысхьащт билет нэпцIыр бзылъфыгъэ ныбжьыкIэм сомэ мин 398-кIэ «къыфащэфыгъ». ПсэолъэшI Iофхэр къыфагъэцэкIэнхэу къагъэгугъи, лIы горэм сомэ мин 350-рэ Iахи, загъэбылъыжьыгъ.

Зы мафэкIэ сомэ мин 850-рэ цIыфхэм ашIокIодэу къыхэкIы, зы тхьамафэкIэ сомэ миллион зэкъодзакIохэм аIэкIахьэуи мэхъу.

Аужырэ къэбархэм ащыщэу Интернетым къихьагъэм мэл Iэхъогъоу шъхьэ 500 хъурэр хъулъфыгъэм къызэрищэфыгъэм фэгъэ­хьыгъ. Мэл­хэр зэращэ­хэрэ уасэм тегушIухьи, зыщэхэрэм заIуигъэкIагъ. Былымхэр зыдэщыIэхэр нэмыкI шъыпкъэу къыри­Iуагъ. Къызэращэщтхэ транспортыр нэсыфэкIэ сомэ миллионитIу ежьым щакIом икарточкэ фыригъэхьагъ. Нэ­ужым щакIор телефоным къыфытеожьыгъэп, мэлхэр зиехэми зы сомэ аIукIагъэп. Мы уахътэм полициер щакIохэми мэлхэми алъэхъух. (Тикорр.).