Гъэмэфэ зыгъэпсэфыгъо уахътэр еджакIохэм аухыгъ. ШIушIагъэу, гукъэкIыжьэу яIэр зэфахьысыжьхэзэ, зэгъэпшэнхэр ашIых.

Мыекъуапэ дэт IофшIапIэу «Нан» зыфиIорэм ипащэу, лъэпкъ IэпэIасэу Нэгъуцу Аслъан илъэс заулэ хъугъэу адыгэ кIэлэцIыкIухэр ыдэжь къырегъэблагъэх.

Шъэожъыехэри, пшъэшъэжъыехэри «Нанэм» адыгабзэкIэ щэгущыIэх, ныдэлъфыбзэр нахь дэгъоу зэрагъашIэ, адыгэ шэн-хабзэхэр зэрахьэх.

— Къалэу Мыекъуапэ, тирайонхэм ащыпсэурэ кIэлэеджа­кIохэр ары къедгъэблагъэхэрэр, — къеIуатэ Нэгъуцу Аслъан. — Нэбгырэ 30 фэдиз мэхъух.

Урысыем, Къэбэртэе-Бэлъкъа­рым, Абхъазым, Пшызэ язаслуженнэ артистэу, Адыгэ Респуб­ликэм инароднэ артистэу Зыхьэ Заурбый кIэлэеджакIохэм аIукIи, театрэм, щыIэныгъэм афэгъэхьыгъэ къэбар гъэшIэгъонхэр къафиIотагъэх. Артистым къышIырэ ролым зыфигъэхьазырзэ шIы­кIэшIу­хэм зэралъыхъурэм еджа­кIохэр щигъэгъозагъэх.

Адыгэ Республикэм изаслужен­нэ артистэу Хъут Рустам зыIо­кIэхэм орэдыбэ къафиIуагъ. АдыгабзэкIэ орэдыр къэпIоным фэшI ныдэлъфыбзэм изэгъэшIэн имэхьанэ зэхахьэм щытегущыIагъэх.

Адыгэ Хасэр яеджапI

Дунэе Адыгэ Хасэм ипрезидент иупчIэжьэгъоу, общественнэ IофышIэшхоу МэщфэшIу Нэдждэт, зэлъашIэрэ археологэу Тэу Ас­лъан «Нанэм» къызэкIохэм, тарихъым, адыгабзэм, археологием, нэмыкIхэм къатегущыIагъэх.

Республикэ общественнэ движениеу «Адыгэ Хасэм» итхьама­тэу ЛIымыщэкъо Рэмэзан кIэща­кIо фэхъуи, зэхэхьэ гъэшIэгъон Хасэр зычIэт унэм щызэхащагъ.

СурэтышI-модельер цIэрыIоу СтIашъу Юр, Дунэе Адыгэ Хасэм хэтэу, зэпасым щыIэ полковникэу ЦIыкIушъо Аслъан, МэщфэшIу Нэдждэт, Тэу Аслъан, ГъукIэлI Сусан, ЛIымыщэкъо Рэмэзан еджакIохэм аIукIагъэх.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм пэгъокIыхэзэ Адыгэ Хасэм ыгъэцэкIэрэ Iофхэм ягугъу къашIыгъ. Ны-тыхэм шъхьафэу гущыIэгъу афэхъугъэх.

— Адыгэ Хасэр еджапIэ тфэ­хъугъэу тэлъытэ, — къытиIуагъ еджакIохэм пэщэныгъэ адызезыхьэхэрэм ащыщэу Хьапэпх Фатимэ. — Нэгъуцу Аслъан, ЛIымыщэкъо Рэмэзан, нэмыкI­хэм тафэраз. Адыгабзэр щэIэ-фэ адыгэ лъэпкъыр щыIэщт — ар дэ­гъоу тиныбжьыкIэхэм къагурыIуагъ. Адыгабзэр, тарихъыр, шэн-хабзэхэр нахьы­шIоу ашIэ зэрэхъугъэ­хэм тегъэ­гушIо. Ядэжьхэм загъэ­зэ­жьыкIэ хэушъхьафыкIыгъэу Iоф зыдашIэжьы.

Хэкум къэзыгъэзэжьыгъэм и Мафэ фэгъэхьыгъэ зэхахьэу филар­монием дэжь щыкIуагъэм кIэлэеджакIохэр хэлэжьагъэх, адыгэ быракъыр пчэгум щагъэбыбэтагъ.

КIэлэцIыкIухэм япащэхэу Хьапэпх Фатимэрэ Тутарыщэ Бэлэрэ къызэраIуагъэу, кIэлэеджакIохэм языгъэпсэфыгъо уахътэ гум къи­нэжьынэу агъэкIуагъ.

ДзэлI Сусанэ, Жэнэ Фатимэ, Хьапэпх Аскэр, Кушъу Ренат, Хъут Альберт, Тутарыщэ Данэ, Тыгъужъ Бэлэ, Хьэтэмэ Джульеттэ, Жэнэ Сэтэнае, фэшъхьафхэм яеплъыкIэхэр зэфахьысыжьхэзэ, «Нанэр» ящыIэныгъэ щыщ зэрэ­хъугъэр ягупшысэхэм къащыхагъэщыгъ.

Адыгэ шъуашэм и Маф

Iоныгъо мазэм и 28-м адыгэ шъуашэм и Мафэ республикэм щагъэмэфэкIыщт. «Нанэм» къэкIо­гъэ ныбжьыкIэ купым «Лъэпкъым игугъапIэхэр» цIэу фаусыгъ.

— ТиныбжьыкIэхэр тигугъапIэх. Арышъ, цIэу афаусыгъэр щыIэныгъэм къыхэхыгъэу щыт, — зэдэгущыIэгъур лъагъэкIуатэ ЦIыкIушъо Аслъан, СтIашъу Юрэ, Тэу Аслъан. — Ны-тыхэм псын­кIэу тагурыIуагъ. Тызэгъусэу Iофтхьабзэхэр зэхэтщэщтых.

КIалэхэм адыгэ паIохэр афадыгъэх, адыгэ шъуашэм и Мафэ хэлэжьэнхэу загъэхьазыры. «На­нэм» щыIэхэу адыгэ музыкальнэ Iэмэ-псымэхэм якъэбархэр зэрагъэшIагъ. Нэгъуцу Аслъан IэпыIэгъу къафэхъузэ, пхъэкIычхэр кIэ­лэеджакIохэм ашIыгъэх. Ор-орэу бгъэцэкIэрэ Iофым уиIэпэ­Iэсэныгъэ зэрэхигъахъорэр ныбжьыкIэхэм зэхашIагъ.

— Ны-тыхэм саIукIэщт, къуа­джэхэм ащыпсэурэ кIэлэ­еджа­кIохэу сэнаущыгъэ зыхэлъхэм салъыкIощт. Илъэси 5 хъугъэ ныбжьыкIэхэр тиIофшIапIэ къы­зыкIохэрэр. ОрэдыIо цIэрыIохэу Дзыбэ Мыхьамэт, Быщтэкъо Азэмат, зэлъашIэрэ сурэтышIэу Бырсыр Абдулахь, фэшъхьаф­хэм зэраIукIагъэхэр тиныбжьыкIэхэм ащыгъупшэ­жьыщтэп, — къытиIуагъ Нэгъуцу Аслъан.

«Дунаир зыгъэнэфырэр тыгъэ, дунаир зэзыгъафэрэр шIэныгъ» адыгэмэ аIо. Купэу «Лъэпкъым игугъапIэхэм» егъэжьэпIэшIухэр ашIыгъэх. Мэшэлахь, Правительствэм икъулыкъушIэхэр, Адыгэ Хасэр, Iофым ыгъэгумэкIыхэрэр IэпыIэгъу къафэхъух. ЩыкIагъэ зимыIэ щыIэп. ГъучI къалэ зиIэри гъучI мастэ щэкIэ. «Лъэпкъым игугъапIэхэм» Адыгэ Хасэри къашъхьэщытыщт. ГущыIэ дахэ къязыIохэрэм яшIушIагъи къыхэтэгъэщы. ИлъэсыкIэ еджэгъур непэ рагъэжьэжьы, языгъэпсэфыгъо уахътэ дэгъоу зыгъэкIуагъэхэм янеущрэ мафэ нахьышIу зэрэхъущтым яцыхьэ телъ. ШIэныгъэм и Мафэ чанэу хэлэжьэнхэ ямурад. ЕмтIылъ Нурбый.