Адыгеим и ЛIышъхьэу КъумпIыл Мурат Мыекъуапэ игу­рыт еджэпIэ заулэмэ язэтегъэпсыхьанрэ ягъэцэкIэжьынрэ зэрэкIорэр ыуплъэкIугъ.

Республикэм ипащэ игъусагъэх АР-м и Премьер-министрэ ипшъэ­рылъхэр зыгъэцакIэу КIэ­рэщэ Анзаур, Мыекъуапэ имэрэу Геннадий Мит­рофановыр, АР-м гъэсэныгъэмрэ шIэныгъэмрэкIэ и Министерствэ ипащэ.

Шъугу къэтэгъэкIыжьы Урысые политическэ партиеу «Единэ Россиер» кIэщакIо зэрэфэхъугъэм, Урысыем и Президентэу Владимир Путиным къызэрэдыригъэштагъэм тетэу гурыт еджапIэхэр джырэ шапхъэхэм адиштэу зэрэзэтырагъэпсыхьащтхэ программэр илъэси 5-м къыкIоцI хэгъэгум зэрэщагъэ­цэкIэщтыр. Шъолъырхэм ягурыт еджапIэхэм гъэцэкIэжьын IофшIэнхэр яшIылIэгъэнри ащ зэу къыхеубытэ.

А гухэлъхэм апае мыгъэ Адыгеим сомэ мил­лион 600 фэдиз къыфыхагъэкIыгъ. Къалэу Мые­къуапэ, Мыекъопэ, Шэу­джэн, Красногвардейскэ районхэм адэт гурыт еджэпIи 8 агъэцэкIэжьыгъ. Къэралыгъо программэу «Къуаджэхэм зэдиштэу хэхъоныгъэ ягъэшIыгъэныр» зыфиIорэм тетэу Шэуджэн районым игурыт еджапIэ гори агъэцэкIэ­жьыгъ.

Республикэм ипащэ дэеу зэхэзыхырэ, зылъэгъурэ кIэлэцIыкIухэр зы­чIэс Адыгэ республикэ еджэпIэ-интернатым щы­Iагъ. ГъэцэкIэжьын Iоф­шIэнхэу еджапIэм ра­шIы­лIагъэхэм сомэ миллион 57-рэ апэIухьагъ, физи­кэмрэ химиемрэкIэ ка­бинетхэм ящыкIэгъэ мебелыр, шхапIэм чIэтыщт оборудованиер къащэфыгъэх.

КъумпIыл Мурат Iоф­шIэнхэр зэрагъэцэкIагъэр ыуплъэкIугъ, еджапIэм къыпэIулъ чIыпIэм изэ­тегъэпсыхьанрэ псы фэбэ­рыкIуапIэм игъэкIэ­жьынрэ мылъкоу апэIухьащтыр агъотынэу пшъэрылъ афишIыгъ.

Республикэм ипащэ къутырэу Гавердовскэм дэт гурыт еджапIэу N 18-ми щыIагъ. Ащ игъэцэкIэжьын пае сомэ миллион 68-рэ фэдиз къыхагъэ­кIыгъ. ПщэрыхьапIэм пае оборудованиер, мебелыр, нэмыкI пкъыгъохэр къащэфыгъэх. Еджа­пIэм къыпэIулъ чIыпIэм изэтегъэпсыхьажьын аухы. Къум­пIыл Мурат гъэцэкIэжьынхэм афэ­гъэзэгъэ подрядчикым щыкIагъэхэм ынаIэ тыраригъэдзагъ, сантехническэ ком­муникациехэм зэхъокIыныгъэхэр афи­шIынхэу пшъэрылъ фи­шIыгъ.

Республикэм и ЛIышъхьэ мы мафэм гимназиеу N 22-мрэ лицееу N 8-мрэ зэрэзэтыра­гъэпсыхьагъэхэр ыуплъэкIугъ. Гимназием спорт оборудова­ниер щагъэуцугъ, еджапIэм икъэшIыхьан ыкIэм фэкIо. Къум­пIыл Мурат подряднэ органи­зацием хэтхэм адэгущыIагъ, еджапIэм къикIыхэзэ, спорт джэгупIэм екIолIэнхэ алъэкIынэу проектым зэхъокIыныгъэ-­хэр фашIынхэу пшъэрылъ афи­шIыгъ.

Республикэм и ЛIышъхьэ лицееу N 8-м къызэкIом, еджапIэм ищагоу агъэкIэжьыгъэр къызэпиплъыхьагъ, лицеим ипа­щэхэм адэгущыIагъ, къихьащт илъэсым еджапIэм игъэцэкIэ­жьын зэрэфэхьазырынхэ фаер ариIуагъ.

«ГъэцэкIэжьынхэр яшIылIэ­гъэнхэу программэм хагъэхьэгъэ гурыт еджэпIэ пстэуми илъэсыкIэ еджэгъум ехъулIэу еджэныр ащырагъэжьэжьын фае. Еджэныр зэпагъэу хъущтэп, кIэлэеджакIохэмрэ кIэлэегъаджэхэмрэ зыдэкIощтхэм икъоу ягупшысэгъэн фае. Iоф­шIэнхэр игъом ыкIи дэгъоу агъэцэкIэнхэм лъэшэу анаIэ тырагъэтын, къэралыгъо программэм амалэу къаритыхэрэр нахь шIуагъэ къытэу агъэфедэн фае», — къыIуагъ Къум­пIыл Мурат.

Республикэм и ЛIышъхьэ АР-м гъэсэныгъэмрэ шIэны­гъэмрэкIэ и Министерствэ ипа­щэ пшъэрылъ фишIыгъ гурыт еджапIэхэм ягъэцэкIэжьын лъы­гъэкIотэгъэнымкIэ муниципальнэ образованиехэм зэ­дэлэжьэныгъэу адыряIэщтым икъоу егупшысэнэу.

АР-м и ЛIышъхьэ ипресс-къулыкъу Сурэтхэр А. Гусевым тыри­хыгъэх.