Процент 96-мэ япсауныгъэ агъэпытагъ
Гъэмэфэ зыгъэпсэфыгъо кампанием изэфэхьысыжьхэр мы мафэхэм ашIыгъэх. Мыщ сомэ миллион 97-рэ пэIуагъэхьагъ.
АР-м иминистрэхэм я Кабинет щыкIогъэ зэхэсыгъом къызэрэщаIуагъэмкIэ, кIэлэцIыкIу мин 22,5-мэ загъэпсэфыгъ ыкIи япсауныгъэ агъэпытагъ. Мыекъопэ районым ит лагерьхэм нэбгырэ мини 3-м ехъу ащыIагъ. ЩыIэныгъэм чIыпIэ къин ригъэуцогъэ унагъохэм къарыкIыгъэ кIэлэцIыкIухэр ары путевкэхэр анахьэу зэратыгъэхэр. Джащ фэдэу Херсон хэкум и Геническэ район къикIыгъэ нэбгырэ 396-мэ ыкIи ДНР-м щыщ нэбгыри 100 республикэм зыщагъэпсэфыгъ.
— БлэкIыгъэ илъэсхэм афэдэу, гъэхъэгъэшIухэр зышIыгъэ кIэлэеджакIохэм путевкэхэр афагъэшъошагъэх. Илъэсыр къызихьагъэм къыщегъэжьагъэу «Артекым» нэбгырэ 243-мэ, «Сменэм» — 14-мэ, «Орленкэм» кIэлэцIыкIу 66-мэ зыщагъэпсэфыгъ ыкIи япсауныгъэ щагъэпытагъ, — къыIуагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.
Министрэм къызэриIуагъэмкIэ, гъэмэфэ зыгъэпсэфыгъо лъэхъаныр зэрифэшъуашэу кIуагъэ. ОшIэ-дэмышIэ Iоф, ашхы-гъэр къямыкIугъэу къыхэкIыгъэп. Къэлэ кIыбым дэт лагерьхэм къякIолIагъэхэр непэ тфэ агъэшхагъэх, программэ гъэшIэгъон яIэу Iоф адашIагъ, агъэчэфыгъэх. Гъэмэфэ зыгъэпсэфыгъо лъэхъаным кIэлэцIыкIухэм япроцент 96-м ехъумэ япсауныгъэ агъэпытагъ.