АР-м мэкъумэщ хъызмэтымкIэ и Министерствэ исоциальнэ интернет нэкIубгъохэм ащыщ тыгъуасэ къызэрэщитыгъэмкIэ, Адыгеим ичIыгулэжьхэм мыгъэ лэжьыгъэу тонн мин 479,2-рэ къаугъоижьыгъ.

— ГъэрекIо къырахыжьыгъагъэм фэдиз пIоми хэукъо­ныгъэ хъущтэп, — къы-Iуагъ министрэу Къуанэ Анзаур. — Джащ фэдэу гурытымкIэ лъытагъэу къыра­хы­жьырэ центнер пчъагъэми хагъэхъон алъэкIыгъ. Бжы­хьэсэ лэжьыгъэу мыгъэ Iуа­хыжьыгъэхэм зэкIэми ар афэ­гъэхьыгъ.

ПстэумкIи бжыхьэсэ лэ­жьыгъэ гектар мини 106-рэ тичIыгулэжьхэм яIагъ. Ащ щы­щэу мин 84-р коцым рагъэубытыгъагъ, мин 11-м ехъум хьэр тырапхъэгъагъ, рапсыр гектар мини 10,5-рэ хъущтыгъэ, тритикалеу гектар 500 яIагъ.

Бжыхьэсэ хьэм изы гектар, гурытымкIэ лъытагъэу, центнер 50,6-рэ къырахыгъ, коцыми ащ фэдиз къытыгъ. ПстэумкIи хьэ тонн мин 55,3-рэ, коц тонн мин 422,3-рэ ыкIи рапс тонн мин 29,7-рэ къаугъоижьыгъ.

Мы мэфэ благъэхэм хъыз­мэтшIапIэхэм ащыщхэр тыгъэ­гъазэм иIухыжьын фежьэщтых. ЗэкIэ гъэтхасэхэм яIожьын Iоныгъо мазэм икъихьагъур ары зыщырагъэжьэщтыр.

Лэжьыгъэу къырахыжьы­гъэмкIэ Адыгеим ятIонэрэ чIыпIэр Урысыем щеубыты, ыпэ итыр гъунэгъу Краснодар краир ары.