УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «Экология» зыфиIорэм къыдыхэлъытагъэу пыдзэфэ пытэхэр зэхэдзыгъэу цIыфхэм къырахынхэм телъытэгъэ Iофтхьабзэхэр Адыгеим щылъагъэкIуатэх.

АР-м псэолъэшIынымкIэ, транс­портымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, УФ-м чIыопсымкIэ и Министерствэ 2021-рэ илъэсым зэзэгъыныгъэу дашIыгъэм тетэу хэкIым изэхэдзын пае контейнер 540-рэ къащэфыгъ. ЗэкIэмкIи ащ сомэ миллиони 8-рэ мин 95-рэ пэIу­хьагъ. Ащ щыщэу сомэ миллиони 8-рэ мин 14-р федеральнэ бюджетым къыхэхыгъ, сомэ мин 81-р республикэ ахъщ.

Контейнерхэр муниципальнэ образованиехэм, шъхьадж ищыкIагъэу къыгъэнэфагъэм тетэу, атырагощэщтых. Министерствэм къызэритыгъэмкIэ, 170-р — Мые­къуапэ, 126-р — Мые­къопэ районым, 120-р — Тэхъу­тэмыкъое районым аща­гъэуцущт. Джащ фэдэу Адыгэ­къалэ — 21-рэ, Джэджэ районым — 25-рэ, Кощхьэблэ районым — 21-рэ, Красногвардейскэ районым — 36-рэ, Теуцожь районым — 12 ыкIи Шэуджэн районым — 9 аратыщт.

Контейнерхэр мы илъэсым ыкIэм нэс зэкIэ муниципальнэ образованиехэм ащагъэуцущтхэу ары АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэр.