Мыекъуапэ изыгъэпсэфыпIэ парк адыгэ джэгухэр мэфэку пчыхьэ къэс щызэхащэх.

Республикэ общественнэ движениеу «Адыгэ Хасэр», адыгэ къашъохэмкIэ ансамблэу «Абрекхэр» лъэпкъ Iофтхьабзэм кIэщакIо фэхъугъэх. ХьатыякIор Ерыгу Адам.

— Къашъохэу «ХьакIулащ», «Ислъамый», «Зыгъэлъат», «ЗэфакIу» зыфиIохэрэр, нэмыкI­хэри къашIых, яIэпэIэсэныгъэкIэ нахь къахэщыгъэхэм шIухьафтынхэр афэтэшIых, — къыти­Iуагъ Адыгэ Хасэм итхьаматэу ЛIымыщэкъо Рэмэзан.

— Адыгэхэм анэмыкIхэу урысхэр, къэндзалхэр, ермэлхэр, фэшъхьафхэри адыгэ джэгухэм къащэшъох, — зэдэгущыIэгъур лъагъэкIуатэ зэхэщэкIо купым хэтхэу Хъот Юныс, Едыдж Мэмэт, ТхьакIумэщэ Налбек.

Израиль къикIыгъэхэ Ацумыжъхэу Сюзанэрэ Азардинрэ зэшъхьэгъусэх. Мыекъуапэ унэ щащэфыгъ. Ягуапэу джэгум еплъых, сурэтхэр къэшъуакIохэм атырахых.

— Лъэпкъ шэн-хабзэхэр ныбжьыкIэхэм зэрахьэхэзэ дахэу къэшъох. Мыекъуапэ и Мафэ фэгъэхьыгъэ пчыхьэзэхахьэм зыфагъэхьазыры, — къытиIуагъ адыгэ джэгум апэрэ чIыпIэр къыщыдэзыхыгъэ къэшъуакIоу Мэрэтыкъо Долэт.

Алиса Прищепэрэ ЛIыбзыу Джантыйрэ ятIонэрэ, Бахъукъо Амиррэ Ацумыжъ Миленэрэ ящэнэрэ чIыпIэхэр къыдахы­- гъэх. Адыгэ Хасэм ишIухьафтынхэр ныбжьыкIэхэм афагъэшъошагъэх. ЗэхэщакIохэм лъэпкъ искусствэр зышIогъэшIэгъонхэр адыгэ джэгум рагъэблагъэх.