ЦIыфыр зэрыпсэун ылъэкIыщт ахъщэ анахь макIэу къэралыгъом щагъэнэфагъэр мыгъэ къызэраIэтыгъэм ишIуагъэкIэ, илъэси 8 — 17 зыныбжь кIэлэцIыкIу е зихэхъогъу зэрыс унагъохэм ыкIи сабый ежэрэ бзылъфыгъэхэм къаратыхэрэм мэкъуогъу мазэр къызихьагъэм къыщыублагъэу къахэхъуагъ.

Шъугу къэдгъэкIыжьын, АР-м иминистрэхэм я Кабинет унашъоу ыштагъэм тетэу, цIыфыр зэрыпсэун ылъэкIыщт ахъщэ анахь макIэу Адыгеим щагъэнэфагъэр сомэ 11970-рэ хъугъэ. Ащ къыпкъырыкIыхэзэ, посо­биехэр зыфэдизыщтхэр агъэнэфагъ. Джы бзылъфыгъэу сабый ежэхэрэм къафэкIорэ ахъщэ тыныр сомэ 6523,5-рэ мэхъу. Ар цIыфыр зэрыпсэун ылъэ­кIыщт ахъщэ анахь макIэм ипроцент 50-фэдиз.

КIэлэцIыкIур зэрыпсэун ­ылъэкIыщт ахъщэ анахь макIэу шъолъырым щагъэнэфагъэм ипроцент 50, процент 75-рэ е 100 пособиеу илъэси 8 — 17 зыныбжь кIэлэцIыкIу е зихэхъо­гъу зэрыс унагъохэм къаратырэр. Адыгеим ащ фэдэ ахъщэ анахь макIэу щагъэнэфагъэр сомэ 12018-рэ мэхъу. Арышъ, ащ ипроцент 50-р къызтефэ­хэрэм сомэ 6009-рэ, ипроцент 75-рэ къызфакIохэрэм сомэ 9013,5-рэ, проценти 100-у къызэратыхэрэм сомэ 12018-р къафатIупщыщт.

Шапхъэу пылъхэм къызэра­дэлъытагъэм тетэу, пособиер къафэкIоным пае ны-тыхэм атыгъэ тхылъхэм специалистхэр ахаплъэхэу, пособиер къатефэу алъытэмэ, ащ ыуж IофшIэгъу мэфитф нахьыбэ темышIэзэ ахъщэр счетым къырагъахьэ.