ЕджапIэхэм илъэсыкIэ еджэгъум зыфагъэхьазыры, лагерьхэм мы гъэ­мафэмкIэ аужырэ чэзыур аухы.

АР-м IофшIэнымкIэ ыкIи ­социальнэ хэхъоныгъэмкIэ и Министерствэ къызэритыгъэмкIэ, мыгъэ кIэлэцIыкIухэм языгъэпсэфыгъо уахътэ зэрифэ­шъуашэм тетэу республикэм щызэхэщагъэ хъугъэ. КIэлэ­цIыкIоу е зихэхъогъоу нэбгырэ мин 22,5-мэ япсауныгъэ зэ­тырагъэуцожьын, загъэпсэфын амал аратыгъ.

Ащ республикэр къызэрэ­щымыуцугъэм министерствэм къы­щыкIагъэтхъы. ЗекIоным ылъэныкъокIэ къэралыгъо IэпыIэгъум итын тегъэпсыхьэгъэ IофшIэныр апэу зыщыпхыра­щыщт шъолъырхэм Адыгеир ахэуцуагъ. ЗекIоным епхыгъэ организациеу республикэм итхэм защагъэпсэфынэу амал къэзытырэ сертификатхэр кIэлэцIыкIу нэбгырэ миным ехъумэ охътэ благъэм аратыщт.

Джащ фэдэу АР-м и ЛIышъхьэ апшъэрэ классхэм арыс кIэлэеджакIохэр шэмбэт-тхьаумэфэ мафэхэм зекIо щэгъэнхэм нахь чанэу ыуж итынхэу ащ фэгъэзагъэхэм афигъэпы­тагъ. Программэр Iоныгъо мазэм иапэрэ мэфипшI атIупщыщт.