Кешбэкыр цIыфхэм агъэфедэшъунэу зыхъугъэм илъэ­ситIу тешIагъ. ЗыгъэпсэфакIохэмкIэ ащ ишIуагъэ къэ­кIо, путевкэу къащэфыхэрэм ауасэхэм япроцент 20-р хабзэм къафызэкIегъэкIожьы. Илъэс къэс ащ фэдэ зэманхэр тIо къыхэфэ — гъатхэмрэ бжы­хьэмрэ.

Тызхэт илъэсым кеш­бэкыр зыкIыгъу турхэр нэбгырэ миллионищым ехъурэмэ ащэфыгъагъэх, ахэм якарточкэхэм сомэ миллиарди 9 фэдиз хабзэм афыригъэ­хьа­жьыгъах.

Бжыхьэ кешбэкыр къы­зэратыжьыщтхэр шы­шъхьэIум и 25-м къыщегъэжьагъэу Iо­ныгъом и 10-м нэс турхэр зыщэфыхэрэр ары. Путевкэм ыуасэ емылъы-ты­гъэу, процент 20-р цIыфхэм якарточкэхэм мэфэ заулэкIэ къара­гъэхьажьыщт, анахьыбэу къараты­жьыщтыр сомэ мин 20-м ехъущтэп. Кеш­бэкым пылъ унашъо­хэм ащыщ турыр мэ­фищырэ чэщиплIы­рэм нахь макIэ мэхъумэ, уасэм щыщ къы­зэрарамытыжьырэр.

Программэм Урысыем ишъолъырхэр зэкIэ хэлэ­жьэнхэ фитых. Правительствэм ипащэ къы­зэриIуагъэмкIэ, бжыхьэ кешбэкыр нэбгырэ мин 600 фэдизмэ агъэфе­дэнэу къалъытагъ.

ЗэкIэми ашIэн фае хэбзэ бюджетым къыхагъэкIырэ ахъщэр къызэратыжьыщтхэр Урысыем имыкIыхэу зыгъэпсэфакIо кIохэрэр арэу зэрэщытыр.

Апэрэ тхьамафэм къы­зэригъэлъэгъуагъэмкIэ, кешбэкыр къыдэзы­лъы­тэрэ турхэр нахьыбэу зыщэфыгъэхэр Шъачэ, Гъэхъунэ Плъыжьым, Санкт-Петербург ыкIи Москва кIонхэу фаехэр ары.