Аужырэ илъэситIум Дагъыстан зыщызыгъэпсэфыхэрэм япчъагъэ хэпшIыкIэу къызэрэхэхъуагъэм хабзэм ынаIэ тыридзагъ. Ащ къыхэкIэу зыгъэпсэфыпIэ зэтегъэпсыхьагъэ кIэу щашIыным пащэхэр тегущыIэхэу рагъэжьагъ.

ПэшIорыгъэшъэу къызэралъытэрэмкIэ, зыгъэ­псэфыпIэм чIыгу гектар 200 фэдиз ыубытыщт, игъэпсын сомэ миллиард 300 Iэпэ-цыпэ пэIуагъэ­хьащт. ХьакIэщэу ща­гъэуцущтхэм номер мин 300-м ехъу ахэтыщт.

Ащ игъэпсын къыхэлэжьэн зылъэкIыщт инвесторхэм ар Каспийскэ хыIушъом щыпшIымэ нахьышIоу алъытэ. Хы­Iушъор пшэхъуалъ, псыр фабэ, цIыфхэм шэкIогъу мазэм ыкIэ нэс зыща­гъэпсэфын алъэкIы.

ХьакIэхэр Дагъыстан нахьыбэу къакIохэу зырагъэжьагъэр Ковид-19-м зыкъызиIэтыгъэм тефагъ. Республикэм ипащэхэм къызэраIорэмкIэ, 2021-рэ илъэсым зыгъэпсэфакIо къафэкIуагъэхэм япчъагъэ миллионым ехъу­гъагъ, ар процент 30-кIэ ыпэрэ илъэсым нахьыбагъ. Отельхэм ахэт но­мер 5400-р хьакIэхэм афикъущтыгъэп.

Рестораторхэмрэ отель­ерхэмрэ я Феде­рацие ивице-президентэу Ва-дим Прасовым къы­зэ­ри­Iо­рэмкIэ, курортым ишIын зимылъку къыхэзылъ­хьащт­хэм Урысыем имы­за­къоу, Кавказым щы­псэу­хэрэри ахэтыщтых.

УрысыемкIэ туринду­ст­рием и Союз ипрезидент гъэшIуагъэу Сергей Шпилько ицыхьэ телъ Дагъыстан Республикэм зыгъэпсэфыпIэ кластерэу щашIыщтыр Шъачэ игъэпсэфыпIэхэм зэря­нэкъокъун ылъэкIыщтым. Сыда пIомэ джырэ лъэ­хъаным цIэрыIо хъухэрэр уахътэм диштэу агъэ­псырэ зыгъэпсэфыпIэ зэхэт инхэр ары.