Зэпахырэ узэу коронавирусым изэраркIэ цIыфхэм языгъэ­псэфыгъо уахътэ икъоу агъэфедэн замылъэкIырэр илъэсищ мэхъу.

Ащ Европэм икъэралыгъохэм Урысыем къытыралъхьэгъэ санкциехэр къыкIэлъыкIуагъэх, язэфыщытыкIэхэр къеIыхыгъэх. Къэралыгъо гъунапкъэхэр зэпыпчынхэр, къухьэшхохэмкIэ узыфэе къалэм е хэгъэгум уанэсыныр къин хъугъэ.

Арэу щытми, зекIоным хэщэгъэ къулыкъухэм агу агъэкIодырэп, цIыфхэм зызэрагъэпсэфыщт амалыкIэхэм алъэ-хъух, зекIоным зыкъырагъэIэтыжьыным пылъых.

IэкIыб хэгъэгухэм къарыкIырэ зыгъэ­псэфакIохэм япчъагъэ процент 95 —97-рэ фэдизкIэ къызэреIыхыгъэр Уры-сыем зекIон индустриемкIэ и Союз ивице-президентэу Дмитрий Гориным къы­Iуагъ.

Коронавирусым зыкъимыIэтызэ, 2019-рэ илъэсым хэгъэгу зэфэшъхьафхэм къарыкIыгъагъэр нэбгырэ миллионитIум ехъущтыгъэмэ, тызхэт илъэсым пчъагъэр мин 81-рэ нахь хъурэп. Ахэм нахьыбэу ахэтыгъэх нэмыцхэр, французхэр, итальянцэхэр, испанцэхэр. Джы гъунапкъэхэр зэрэзэфашIыгъэхэм, къухьэлъатэхэр икъоу зэрамыгъэфедэшъурэм инэу изэрар къэкIо.