Социальнэ проект анахь дэгъухэм якъыхэхын фэгъэхьыгъэ зэнэкъокъум изэфэхьы­сыжьхэр къэнэфагъэх. 2022-рэ илъэсым социальнэ мэхьанэ зиIэ проектхэр агъэцэкIэнхэм фэшI коммерцием емыпхыгъэу Iоф зышIэрэ организацие 30-мэ АР-м IофшIэнымкIэ ыкIи социальнэ хэхъоныгъэмкIэ и Министерствэ зэзэгъыныгъэхэр дашIы­гъэх. Зэнэкъокъум текIоныгъэ къыщыдэзыхыгъэхэм афагъэшъошэщт ахъщэри агъэ­нэфагъ.

Министерствэм къызэрэщаIуагъэмкIэ, грантхэр зыфагъэшъошэгъэ проектхэр лъэныкъо заулэкIэ зэтеутыгъэу щытыщтых: граждан обществэм епхыгъэ институтхэм яхэгъэхъон, лъэпкъ зэфэшъхьафхэм къахэкIыгъэ цIыфхэм ыкIи дин зэмылIэужыгъохэр зылэжьыхэрэм зэгурыIоныгъэ азыфагу илъыныр, тарихъым икъызэтегъэнэн, Урысыем щыпсэухэрэм патриотическэ пIуныгъэ яIэным, социальнэ фэIо-фашIэхэм, цIыфхэм, тыкъэзыуцухьэрэ дунаим, псэушъхьэхэм якъэухъумэн фэгъэхьыгъэщтых. Джащ фэдэу гъэсэныгъэм, культурэм, искусствэм япхыгъэ проект­хэм ыкIи шIушIэ Iофтхьабзэхэм (волонтерствэм) дырагъаштэ.

— Грантыр къэзылэжьыгъэхэм зэзэгъыныгъэ адэтшIыгъ, ащ ишIуагъэкIэ ахэм пшъэдэ­кIыжьэу яIэр нахь къагуры­Iощт, ахъщэр зэрифэшъуашэу агъэфедэщт. Социальнэ про­ектхэм къыдалъытэрэ пшъэ­рылъхэр зэрифэшъуашэу гъэцэкIагъэ хъущтых, — къыща­Iуагъ министерствэм.