Общественнэ шIошIхэр зыщызэфахьысыжьырэ Гупчэм бэдзэогъу мазэм къызэри­тыгъэмкIэ, Урысыем щыпсэурэмэ япроцент 72-м лъэпкъ проектхэм адырагъаштэ.

ЗэупчIыгъэхэм ащыщыбэм къыхагъэ­щыгъ аужырэ илъэсым цифровой экономикэм ыкIи зекIоным псэупIэхэр зэтегъэпсыхьажьыгъэнхэм, гъогухэр щынэгъончъэнхэм алъэныкъокIэ къэралыгъом Iофыгъуабэ зэрэзэшIуихырэр. Джащ фэдэу унагъом ыкIи кIэлэцIыкIу­хэм нахь анаIэ атырагъэты. 2021-рэ илъэсым ашIагъэр «Экспертым» зэфихьысыжьыгъ ыкIи мы илъэсым зэшIуа­хыгъэхэми защигъэгъозагъ.

Лъэпкъ проектэу «Гъэсэныгъ» зыфиIорэм къыдыхэлъытагъэу, кIэлэцIыкIухэм проект гъэшIэгъонхэм язэхэщэн хэлэжьэнхэ амал яI.

2008-рэ илъэсым къыщегъэжьагъэу Адыгеим технопаркэу «Кванториум» зыфиIорэр къыщызэIуахыгъ. Ащ ишIуагъэкIэ кIэлэцIыкIухэм ыпкIэ хэмылъэу инженернэ сэнэхьатхэм зафагъэхьазыры. Джащ фэдэу гъэсэныгъэ тедзэ «IT-клуб» зыфиIорэм щагъотын амал яI. ПсэупIэ анахь чыжьэхэм ащыпсэухэрэм апае «Точка роста» зыфиIорэр зэха­щагъ. Ащ ишIуагъэкIэ кIэлэеджэкIо сэнаущхэр къыхагъэщых. «Мобильный Кванториум» зыфиIорэм къоджэ псэупIэхэм ащыпсэухэрэм гъэсэныгъэ тедзэ ащарагъэгъоты. Творческэ ыкIи спорт кIуа­чIэу ахэ­лъыр «Полярис Адыгеи» зыфиIорэ шъо­лъыр Гупчэм къыщыхагъэщы. Ахэм анэмыкIэу профориентациемкIэ проектэу «Билет в будущее» зыфиIорэр щыIэныгъэм щыпхыращы. Ащ ишIуагъэкIэ я 6 — 11-рэ классхэм ащеджэхэрэр сэнэхьат зэфэшъхьафхэм нэIуасэ афашIых. Проектым къыдыхэлъытагъэу колледжхэм ыкIи техникумхэм аужырэ шапхъэхэм адиштэрэ мастерскойхэр ачIагъэуцох.

Адыгэ Республикэм проектэу «Билет в будущее» зыфиIорэр 2018-рэ илъэсым къыщегъэжьагъэу зэхащагъ. КIэлэеджэкIо 4500-рэ фэдиз ащ хэлэжьагъ.

Проектым къыдыхэлъытагъэу 2022-рэ илъэсым кIэлэегъэджэ 24-мэ мы лъэныкъомкIэ яшIэныгъэхэм ахагъэхъощт. МыекъуапэкIэ проектым иплощадкэ хъугъэх Мыекъопэ индустриальнэ техникумыр, Мыекъопэ политехническэ техникумыр, Мыекъопэ къэралыгъо технологическэ университетыр, Джэджэ районымкIэ Дондуковскэ мэкъумэщ техникумыр, Красногвардейскэ рай­онымкIэ аграрнэ-промышленнэ техникумыр.

Проектэу «Билет в будущее» зыфи­Iорэм епхыгъэ егъэджэнхэр Iоныгъо мазэм рагъэжьэщтых. Ащ хэлажьэ зышIоигъохэр платформэу https://bvbinfo.ru зыфиIорэм зыщатхын фае.

ЕплъыкIэхэр

Федеральнэ проектэу «Билет в будущее» зыфиIорэм ыкIи Гуманитарнэ проектхэмкIэ Фондым япащэу Иван Есиныр:

— Проектыр гъэшIэгъоны ыкIи шIогъэшхо хэлъ. КIэлэеджакIо пэпчъ ыпкIэ хэмылъэу ыгукIэ зыфэщэгъэ сэнэхьатыр ыушэтын елъэкIы. Урысыем мыщ фэдэ проектхэр зэрэщызэхащэрэм мэхьанэ ин иI, къэралыгъуабэмэ ар ащызэшIуа­хырэп.

АР-м гъэсэныгъэмрэ шIэныгъэмрэкIэ иминистрэ игуадзэу Пэрэныкъо Сусанн:

— Илъэсищ хъугъэу проектым иплощадкэу Адыгеир щыт. УФ-м гъэсэныгъэм­кIэ и Министерствэ иIэпыIэгъоу ар зэхащэ. Лъэпкъ проектэу «Гъэсэныгъ» зыфиIорэм къыдыхэлъытагъэу «Успех каждого ребёнка» зыфиIорэм ифедеральнэ проект хэхьэ.

Шъолъырым хэхъоныгъэ ышIыным фэшI сэнаущыгъэ ин зыхэлъ ныбжьыкIэхэр тищыкIагъэх.

ДЕЛЭКЪО Анет.