Къэралыгъо IэпыIэгъум ишIуагъэкIэ
Илъэсым къыкIоцI къэралыгъо IэпыIэгъум ишIуагъэкIэ мэкъумэщ хъызмэтшIэпIэ 40-м ехъу Адыгеим щагъэпсыгъ.
Мы илъэсым «Агростартап» зыфиIорэм игрантхэр къаратынхэмкIэ нэбгырэ 79-мэ заявкэхэр атыгъэх. Зэнэкъокъум хэлэжьагъэхэм ащыщэу нэбгырэ 43-мэ текIоныгъэр къыдахыгъ (ар 2021-рэ илъэсым ебгъапшэмэ нэбгырэ 15-кIэ нахьыб). Грант IэпыIэгъум пстэумкIи сомэ миллион 73-м ехъу пэIуагъэхьагъ (икIыгъэ илъэсым ар сомэ миллион 45-рэ фэдизыгъ).
А мылъкум хагъэхъонымкIэ зишIуагъэ къэкIуагъэр заявкэхэм япхыгъэ тхылъхэр игъом зэрагъэхьазырыгъэхэр ары. Грант IэпыIэгъур зэратыгъэхэм зэкIэми 2022-рэ илъэсым иапэрэ мэзих ахъщэр зэрифэшъуашэу агъэфедагъ. Джащ фэдэу «Агростартапым» ишIуагъэкIэ предпринимательствэ цIыкIум исубъект 43-рэ агъэпсын алъэкIыгъ (планыр 23-рэ). Грантыр зэратыгъэхэр — былымхъуным ылъэныкъокIэ проекти 9, цумпэ культурэхэм якъэгъэкIын хэхъоныгъэ ышIынымкIэ проект 16, лэжьыгъэ ыкIи дэгъэ культурэхэм ахашIыкIыхэрэм якъыдэгъэкIынкIэ проект 14, хэтэрыкIхэм ыкIи картоф лэжьыным хэхъоныгъэ ышIынымкIэ проекти 4.
Джыри зы IэпыIэгъу — мэкъумэщ потребительскэ кооперацием IэпыIэгъу фэхъугъэнымкIэ субсидиехэр ятыгъэныр. 2022-рэ илъэсым мы лъэныкъом сомэ миллиони 4,9-рэ пэIуагъэхьанэу къыдыхалъытагъ. Ащ щыщэу сомэ миллиони 3 фэдиз кооперативэу «Молочные реки» зыфиIорэм ратыгъ, щэр къыщэфыным тыригъэкIодэгъэ ахъщэм мыр пэIуигъэхьащт. Ащ ишIуагъэкIэ кооперативым хахьэхэрэм япчъагъэ нахьыбэ хъугъэ.
— Къоджэ предпринимательствэм хэхъоныгъэ ышIынымкIэ, къоджэ псэупIэхэм адэсхэм IофшIэн агъотынымкIэ, къыдагъэкIырэм ибагъэ нахьыбэ хъунымкIэ федеральнэ гупчэм къытырэ амалхэр зэкIэ икъоу дгъэфедэнхэ фае. Грант IэпыIэгъум шIуагъэу къыхьырэм икъоу лъыплъэгъэн ыкIи АПК-м илъэныкъохэу анахь мэхьанэ зиIэхэм нахьыбэу адеIэгъэн фае. Адыгеим и ЛIышъхьэ джащ фэдэ пшъэрылъ къытфегъэуцу, — къыIуагъ Премьер-министрэм ипшъэрылъхэр зыгъэцэкIэрэ КIэрэщэ Анзаур.