Хэбзэнчъэу лэжьапкIэр къы­чIихыгъ

Мыекъуапэ имедицинэ учреждениехэм ащыщ горэм иврач шъхьаIэ иIэнатIэ къызфигъэфеди бзэджэшIагъэ зэрэзэрихьагъэм фэшI агъэмысэ.

УФ-м и Следственнэ комитет иследственнэ ГъэIорышIапIэу АР-м щыIэм Мыекъопэ районымкIэ иотдел иследовательхэм къаугъоигъэ материалхэмкIэ врач шъхьаIэм лажьэ иIэу хьыкумым ыгъэунэфыгъ ыкIи ыгъэмысагъ.

ЩынэгъончъэнымкIэ федеральнэ къулыкъоу Адыгэ Республикэм щыIэм къыугъоигъэ материалхэмкIэ уголовнэ Iофыр къызэIуахыгъ.

Следствием ыкIи хьыкумым зэрагъэунэфыгъэмкIэ, лажьэ зиIэу агъэмысэрэм иIэнатIэ къызфигъэфеди, республикэм ит сымэджэщхэм ащыщ горэм иотделение ипащэ «Урология» ыкIи «Акушерство и гинекология» зыфиIорэ сэнэхьатхэм арылэжьэн зэрилъэкIыщтыр къэзыушыхьатырэ сертификатыр зэримыIэр ышIэзэ, 2016-рэ илъэсым тыгъэгъазэм къыщыубла­гъэу отделением ипащэ мы IэнатIэхэр зыдихьынхэ ылъэ­кIынэу унашъом кIэтхагъ.

Врач шъхьаIэр хэбзэнчъэу зэрэзекIуагъэм къыкIэлъыкIоу 2017-рэ илъэсым щылэ мазэм къыщыубла­гъэу 2021-рэ илъэсым гъэтхапэм нэс ыпшъэкIэ зигугъу къэтшIыгъэ сэнэхьатхэр ыгъэцэкIагъэ фэдэу ытхи, лэжьапкIэу сомэ мини 164-м ехъу къычIихыгъ.

Хьыкумым иунашъокIэ врачым пшъэдэкIыжьэу тазыр тыралъхьагъ.

ХьыкумышIыр агъэмысагъ

Мыекъопэ къэлэ хьыкумым ихьыкумышI къуалъхьэ къазэраIихыгъэм епхыгъэ уголовнэ Iофэу къызэIуахыгъэм ихэплъэн ыкIэм фэкIуагъ.

Урысыем и Следственнэ комитет иследственнэ ГъэIорышIапIэу АР-м щыIэр Iоф къинхэм язэхэфынкIэ отделым иследовательхэм Мыекъопэ къэлэ хьыкумым ихьыкумышIэу Iоф зышIэщтыгъэм къыфызэIуахыгъэ уголовнэ Iофым хэплъагъ. УФ-м къэралыгъо IэнатIэ щызыгъэцакIэрэм хэбзэнчъэу къуалъхьэ къазэраIихыгъэмкIэ бзэджэшIагъэ зэрихьагъэу хьыкумышIыр агъэмысэ. Урысыем и Следственнэ комитет и Тхьаматэ уголовнэ Iофыр къызэIуихыгъ.

Следствием зэригъэунэфыгъэмкIэ, Мыекъопэ районым ихьыкумышI 2021-рэ илъэсым шэкIогъум икабинет чIэсэу гражданскэ IофымкIэ даорэм иIоф ифедэ хэлъэу зэхифыным фэшI къуалъхьэу сомэ мин 50 къыIихыгъ. Къуалъхьэр ыштэзэ щынэгъончъэнымкIэ федеральнэ къулыкъум и ГъэIорышIапIэу АР-м щыIэм икъулыкъушIэхэм хьыкумышIыр аубытыгъ.

Федеральнэ лъы­хъуным щыIэр къаубытыгъ

УФ-м и Следственнэ комитет иследственнэ ГъэIорышIапIэу АР-м щыIэм илъэс 66-рэ зыныбжь хъулъфыгъэм ылъэныкъокIэ уголовнэ Iоф къызэIуихыгъ. Хэгъэгу кIоцI къулыкъум иIофышIэ ищыIэныгъэ зэрар рихын гухэлъ зэриIагъэм фэшI ар агъэ­мысэ.

Следствием зэригъэунэфыгъэмкIэ, 2022-рэ илъэсым шышъхьэIум и 17-м пчыхьэм Тэхъутэмыкъое районым коммерцием емыпхыгъэ чъыгхэтэ товариществэу «Дружба» зыфиIорэм дэжь АР-м игъогу патруль къу­лыкъу иIофышIэхэм автомобилэу «ВАЗ»-21074-р къа­гъэуцугъ идокументхэр ауплъэкIунэу. КъулыкъушIэр водителым дэгущыIэзэ, гу лъитагъ ар зэрешъуагъэм. Ащ къыхэкIэу транспортыр ыгъэIорышIэн фимытэу административнэ протокол фызэхагъэуцуагъ. Арэу щытми, хъулъфыгъэр машинэм итIысхьи, къулыкъу­шIэхэм закъыримыгъэубытэу кIитхъуи, яунэ екIо­лIэжьыгъ. Ащ фэдизым къулыкъушIэхэр ащ ыуж итхэу къафэуцугъэп.

Нэужым къулыкъушIэхэр япчъэIупэ зэрэIутхэр зелъэгъум, унэм илъэдэжьи, шакIохэм агъэфедэрэ шхончыр къырихыгъ ыкIи къулыкъушIэхэм яавтомобилэу полицием иIофышIэ нэбгыритIу зэрэсыгъэм еуагъ. Ащ ыуж лажьэ зиIэр имашинэ итIысхьи, патрульнэ автомобилым ышIэзэ еутэкIыгъ ыкIи а чIыпIэр псынкIэу къыбгыни, автомобилым исэу зигъэбылъыгъ.

Тэхъутэмыкъое межрайон следственнэ отделым ыкIи уголовнэ IофхэмкIэ къулыкъушIэхэм псынкIэу зэрахьэгъэ Iофтхьабзэхэм яшIуагъэкIэ бзэджашIэр чэщ-зымафэм къыкIоцI къаубытыгъ. ЗэрагъэунэфыгъэмкIэ, республикэу Темыр Осетием — Аланием укIын бзэджэшIагъэ зэрэщызэрихьагъэм фэшI 1995-рэ илъэсым къыщегъэжьагъэу федеральнэ лъыхъуным щыI.

Мы уахътэм ехъулIэу следствиер макIо, хъулъфыгъэм нэмыкI бзэджэшIагъэ зэрихьагъэмэ агъэунэфы. АР-м и Прокуратурэ къызэIуихыгъэ уголовнэ Iофыр хьыкумыр хэплъэнэу фигъэхьыгъ.

Хьапсым чIэсэу бзэджэшIагъэ зэрихьагъ

УФ-м и Следственнэ комитет иследственнэ ГъэIорышIапIэу Адыгеим щыIэм Iоф къинхэм язэхэфынкIэ отделым иследовательхэм хьапсым чIэсым ылъэныкъокIэ уголовнэ Iоф къызэIуихыгъ. Экстремизмэм пылъ организацием хэтэу Iоф адишIэу къы­зэрэчIагъэ­щыгъэм къыхэкIэу ар агъэмысэ.

ЩынэгъончъэнымкIэ федеральнэ къулыкъум и ГъэIо­рышIапIэу Адыгеим иIэм ыкIи бзэджэшIагъэ зезыхьагъэхэм пшъэдэкIыжь зыщарагъэхьырэ гъэIорышIапIэу Адыгеим щыIэм къаугъоигъэ материалхэмкIэ уголовнэ Iофыр къызэIуахыгъ.

Следствием зэригъэунэфыгъэмкIэ, республикэм ит хьапсхэм ащыщ горэм пшъэдэкIыжьыр щихьызэ, бзэджашIэр 2018-рэ илъэсым дунэе общественнэ движениеу «Арестантское уголовное единство» (АУЕ) зыфиIорэм хэхьагъ. 2020-рэ илъэсым чъэпыогъум и 20-м УФ-м и Апшъэрэ хьыкум иунашъокIэ экстремистскэ организациеу мыр агъэунэфыгъ.

Ащ емылъытыгъэу, лажьэ зиIэм ышIэзэ экстремистскэ организацием хэтыгъ ыкIи чанэу Iоф адишIагъ. Движениеу «АУЕ» зыфиIорэм ишIуагъэ аригъэкIызэ, хьапсым дэлъ шапхъэхэр ыукъоным пылъыгъ, ащ нэмыкIэу экстремизмэм епхыгъэу иеплъыкIэхэр къы­риIотыкIыщтыгъэх.

Мы уахътэм ехъулIэу уголовнэ IофымкIэ зэхэфынхэр лъагъэкIуатэх.

НэкIубгъор зыгъэхьазырыгъэр КIарэ Фатим.