ЫпкIэ лъамытэу кIэлэеджакIохэм загъэпсэфыщт
Урысыем ишъолъырхэу зекIоным епхыгъэ фэIо-фашIэхэр зыщаушэтыщтхэм Адыгеири ахагъэхьагъ. Республикэм имуниципалитетхэм арыс кIэлэцIыкIу 1300-рэ фэдизмэ мы охътэ благъэм Адыгеим изекIо организациехэм защагъэпсэфын языгъэлъэкIыщт сертификатхэр аратыщтых.
Республикэм игурыт еджапIэхэм яя 10 – 11-рэ классхэм арысхэм зыгъэпсэфыгъо мафэм зекIохэр афызэхэщэгъэнхэмкIэ Iофэу ашIэрэр агъэлъэшынэу Адыгеим и ЛIышъхьэ пшъэрылъ къафишIыгъ. Iоныгъом иапэрэ мэфипшI программэм игъэцэкIэн фежьэщтых.
ЗекIонымрэ зыгъэпсэфыпIэхэмрэкIэ Комитетым къызэритыгъэмкIэ, документхэм ягъэхьазырын ыкIэм фэкIо. Джащ фэдэу къэралыгъо фэIо-фашIэхэр социальнэ лъэныкъом щызыгъэцакIэхэрэм яреестрэ хагъахьэхэмэ зышIоигъо туроператорхэми заявкэхэр аIахыхэу аублагъ. Я 5 — 9-рэ классхэм арысхэм ыпкIэ зыхэмылъ зекIонхэр афызэхэзыщэщтхэр ары ащ къыхиубытэхэрэр.
ЗекIоныр чэщ-зымафэм къехъун, кIэлэцIыкIухэр ыпкIэ хэмылъэу агъэшхэнхэ, экскурсииплI нахь мымакIэу афызэхащэн, я 3-рэ классым къыщымыкIэрэ хьакIэщым рагъэсынхэ фае.