2020-рэ илъэсым имэлылъфэгъу мазэ къыщегъэжьагъэу ны мылъкум исертификат агъэпсыным пае ны-тыхэр ПенсиехэмкIэ фондым екIолIэнхэ ищыкIэгъэжьэп.

КIэлэцIыкIур къызэрэхъугъэр, унагъом ны мылъкур къызэрэтефэрэр къэзыушыхьатырэ тхылъыр ЗАГС-р ары фондым IэкIэзыгъахьэрэр. Ащ къыпкъырыкIхэзэ, нэмыкIэу ищыкIагъэ­хэр агъэпсых. Нэужым сертификатыр зэрэхьазырыр ПенсиехэмкIэ фондым икъэбарлъыгъэ­Iэс системэ щагъэунэфышъ, къэралыгъо фэIо-фашIэхэм япортал е фондым иинтернет нэкIубгъо «унэе кабинетэу» ным щыриIэм агъэхьы. Пандемием илъэхъан ары ащ фэдэ шIыкIэм анахьэу игъо дэдэ зыхъугъэр.

КIэу ны мылъкум фэгъэхьыгъэ программэм къыхэхьагъэ­хэм ащыщ сертификатыр тхьапэм темытэу, электроннэ шIыкIэу зэрэгъэпсыгъэр. Ау ащ пае къэмынэу, ным ищыкIагъэ зы­хъукIэ тхьапэр къаIихын фит.

УФ-м ПенсиехэмкIэ ифонд и Къутамэу АР-м щыIэм къызэритыгъэмкIэ, илъэситIоу шэпхъа­кIэхэр зыщыIэхэм ыуж те­шIагъэм Адыгеим щыпсэурэ унэгъо 5400-м ехъумэ ащ тетэу ны мылъкум исертификат афагъэпсыгъ.

Сабыир ыпIунэу зыштэгъэ унагъохэм мы шапхъэхэр анэсыхэрэп. Ахэм лъэIу тхылъри, нэмыкIэу ищыкIагъэхэри ежьхэм ашъхьэкIэ рахьылIэн фае.

НахьыпэкIэ ны мылъкум къы­щыдэлъытэгъэ ахъщэр ипотекэм е ежь иIахьэу (первоначальный взнос) ащ хилъхьащтым пэIуигъэхьанэу рихъухьагъэмэ, ащ пае лъэIу тхылъыр ПенсиехэмкIэ фондми, банкми аритынхэ фаеу щытыгъ. Джы шэпхъакIэ­хэм къызэрэдалъытэрэмкIэ, банкым екIуалIэмэ зэкIэри фагъэпсыщт. Ащ пае УФ-м ПенсиехэмкIэ ифонд и Къутамэу АР-м щыIэм ПАО-у «Сбербанк России», «Банк ВТБ», «МинБанк», АО-у «Россельхозбанк, АО-у «ДОМ.РФ» ыкIи ООО-у «Кубань Кредит» зыфиIохэрэм зэзэгъыныгъэхэр адишIыгъэх.

Унагъом тхылъхэр банкым зыщигъэпсыкIэ, фондым и Къу­та­мэу зэпхыгъэм къэбарыр IэкIагъахьэшъ, ащ къыпкъы­рыкIхэзэ ны мылъкур агъэпсы. Ащ ыуж мэфитф нахьыбэ тырамыгъашIэу ахъщэр зищыкIагъэм фатIупщы.