ШышъхьэIум и 25-м къыщегъэжьагъэу и 27-м нэс КIэлэцIыкIу культурнэ форум Москва щыкIуагъ. Урысыем ичIыпIэ зэфэшъхьафхэм ащыщ кIэлэцIыкIу 1500-рэ ащ хэлажьэ. Адыгеим икIыгъэхэри ахэм ахэтых.

— КIэлэцIыкIухэм гъэшIэгъоныбэ алъэгъугъ. НэIосакIэхэр зэрашIыгъэм дакIоу яшIэныгъэхэмкIэ зэдэгощагъэх. ГущыIэм пае, Адыгеим икIыгъэ кIэлэцIыкIухэр КъокIыпIэ Чыжьэм къикIыгъэхэм нэIуасэ афэхъугъэх. Тимузыкантхэм шыкIэпщынэр арагъэлъэгъугъ ыкIи зэрэбгъэфедэщтыр афаIотагъ, — еIо купым икураторэу, искусствэмкIэ колледжэу Тхьабысымэ Умарэ ыцIэ зыхьырэм икIэлэегъаджэу Ольга Амаловам.

НыбжьыкIэхэм апае лекцие 60, мастер-классхэр афызэхащэщтых. Форумым иIофшIэн культурэм иIофышIэхэу Сергей Безруковыр, Игорь Бутман, Елена Гагаринар, Юлиана Слащевар, Николай Цискаридзе хэлэжьагъэх.

Джащ фэдэу Адыгеим икIыгъэхэм культурнэ-просветительскэ экскурсие афызэхащагъ.