Сабыибэ зиIэ ныхэм зэтыгъо ахъщэ тынэу къэралыгъом къафитIуп­щыщтым фэгъэхьыгъэ унашъор УФ-м и Правительствэ шышъхьэIум и 24-м ыштагъ.

Ащ иинтернет нэкIубгъо къы­зэрэщиIорэмкIэ, мы илъэсым къыщыублагъэу УФ-м и Президент иунашъокIэ «Мать-героиня» зыфиIорэ щытхъуцIэр агъэнэфагъ. Шапхъэу ащ пылъхэм къызэрэдалъытагъэмкIэ, сабыипшI е нахьыбэ къызфэхъугъэу ыкIи зыпIугъэ ныхэр ары цIэ лъапIэр зытефэщтхэр. Къэралыгъом анахь лъапIэу ыгъэ­шъуашэхэрэм ар ащыщыщт, «УФ-м и ЛIыхъужъ», «УФ-м IофшIэнымкIэ и ЛIыхъужъ» зыфиIохэрэм арагъэпшэщт. Ащ имызакъоу, «Мать-героиня» зыфиIорэ цIэ лъапIэ къызфа­гъэшъошагъэхэм зэтыгъо ахъщэ тынэу сомэ миллион къафатIупщыщт.

Джащ фэдэу «Родительская слава» зыфиIорэ орденымкIэ къыхагъэщыщтых сабыибл е нахьыбэу къызфэхъугъэхэу, зы­пIу­гъэхэр. Ахэм сомэ мини 100 зэтыгъоу аратыщтыгъэмэ, джы ар сомэ мин 500-м нагъэсыгъ.

Мы орденым имедаль къаратыщт сабыиплI е нахьыбэу зиIэхэм. Ахэм сомэ мин 200 зырыз къэралыгъом къафитIупщынэу унашъом итхагъ.

2022-рэ илъэсым мы наградэхэмкIэ къыхагъэщыщтхэм зэтыгъо ахъщэ тынэу къафатIупщыщтым пэIухьащтыр IэпэчIэгъэнэ фондым къыхэхыгъэным фэгъэхьыгъэ унашъор УФ-м и Правительствэ ыштагъ. КъыкIэ­лъыкIорэ илъэсхэм ар къэралыгъо бюджетым къыдэлъытэгъэщт.