Процент 80-м ехъур агъэхьазырыгъах
ПсэупIэ-коммунальнэ хъызмэтым епхыгъэ предприятиехэм бжыхьэ-кIымэфэ уахътэхэм зафагъэхьазыры.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, пстэумкIи котельнэ 257-рэ, фэбэрыкIуапIэу километрэ 302-рэ, унэхэм ягъэфэбэн ыкIи псы стырыр аIэкIэгъэхьэгъэным фэгъэзэгъэ пункт 25-рэ, гъэстыныпхъэ шхъуантIэм икIуапIэу километрэ мини 3-м ехъу, псыр зыщаубытырэ 320-рэ, псым, электричествэм якIуапIэу ыкIи псы шIоир зэрыкIорэ километрэ мини 2,5-рэ, фэтэрыбэу зэхэт унэ 1805-рэ агъэцэкIэжьынэу е агъэкIэжьынэу мыгъэ планым хэтыгъ. Процент 80-м ехъоу IофшIэнхэр зэшIохыгъэ хъугъэ. Муниципальнэ образованиехэмрэ псэупIэ-коммунальнэ хъызмэтшIапIэхэмрэ сомэ миллиони 100 фэдиз ахэм апэIуагъэхьагъ.
Коммунальнэ хъызмэтым епхыгъэхэм ягъэцэкIэжьын дакIоу социальнэ псэуалъэхэм, сымэджэщхэм, еджапIэхэм, кIэлэцIыкIу IыгъыпIэхэм фабэр къязытырэ системэхэр бжыхьэ-кIымэфэ уахътэхэм афагъэхьазырых. IофшIэнхэр Iоныгъо мазэр къэмысызэ аухынхэ фае. Ащ ыуж, хабзэмкIэ, Ростехнадзорым и ГъэIорышIапIэу Темыр Кавказым щыIэм илIыкIохэм ауплъэкIух, шапхъэхэм адимыштэрэ къыхагъэщымэ, ар агъэтэрэзыжьыным пае пIэлъэ гъэнэфагъэ къараты.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, мыгъэ ащ фэдэ уплъэкIунхэр нахьыжьэу, бэдзэогъу мазэм, рагъэжьагъэх. Къыхагъэщырэ хэукъоныгъэхэр агъэтэрэзыжьынхэу игъо ифэнхэр ары ащ ушъхьагъу шъхьаIэу иIэр.
Красногвардейскэ, Теуцожь, Шэуджэн ыкIи Тэхъутэмыкъое районхэм, Мыекъуапэ япсэупIэ-коммунальнэ хъызмэт епхыгъэ псэуалъэхэр ауплъэкIугъахэх. ЩыкIагъэу къыхагъэщыгъэхэр муниципальнэ образованиехэм мы уахътэм агъэтэрэзыжьых. Ащ нэужым Ростехнадзорым илIыкIохэм ахэр джыри зэ ауплъэкIужьыщтых. Чъэпыогъум и 15-м нэс псэупIэ-коммунальнэ хъызмэтыр бжыхьэ-кIымэфэ уахътэхэм зэрафэхьазырыр къэзыушыхьатырэ тхылъхэр къаратынхэ фае.
Iофыгъо шъхьаIэу зыгъэохъухэрэм ащыщ псэупIэ-коммунальнэ фэIо-фашIэхэм апкIэ игъом къэзымытыхэрэр зэрахэтхэр. Министерствэм тызэрэщигъэгъозагъэмкIэ, шышъхьэIу мазэм и 1-м нэс пштэмэ, гъэстыныпхъэ шхъуантIэу агъэфедагъэм пае къатыжьынэу щытыр сомэ миллион 298,6-м нэсыгъ, электроэнергиемкIэ ателъыр сомэ миллион 97,5-рэ.
Фабэм ыкIи электричествэм япхыгъэ псэуалъэхэм ащыщыбэр жъы зэрэхъугъэм ыпкъ къикIыкIэ чIэнагъэхэр ашIых, лыеу агъэкIодэу мэхъу. Ар ыкIи псэупIэ-коммунальнэ хъызмэтым ипредприятиехэм ахъщэм икъэугъоин икъоу Iоф зэрэдамышIэрэр чIыфабэ зэрэзэтехьэрэм иушъхьагъу шъхьаIэхэу министерствэм къыщаIуагъ. Ащ пае чIыфэхэм якъэугъоижьын фэгъэзэгъэнэу ведомствэ зэфэшъхьафхэм ялIыкIохэр зыхагъэхьэгъэ комиссие зэхащагъ.
Арэу щытми, мы лъэныкъомкIэ пшъэрылъэу яIэр игъом гъэцэкIэгъэным ыуж итых. АгъэцэкIэжьыгъэхэм, зэблахъухэрэм ямызакъоу, кIымэфэ охътэ нахь чъыIэр къызихьэкIэ фабэм икъэтын епхыгъэ псэуалъэхэм щынэгъончъэу Iоф ашIэным фэшI, аварие къэхъумэ ар зэрэдагъэзыжьыщт схемэр, гъэцэкIэжьын IофшIэнхэм апае ящыкIэгъэщтыр пэшIорыгъэшъэу агъэхьазырыгъ.
ХЪУТ Нэфсэт.