Мыекъуапэ иволейбол командэу «Динамо-МГТУ-м» 2022 – 2023-рэ илъэс ешIэгъум зыфегъэхьазыры.

— Урысыем волейболымкIэ изэнэкъокъоу апшъэрэ лигэм икупэу «Б-м» тыщешIэщт, — къы­тиIуагъ «Динамо-МГТУ-м» итренер шъхьаIэу, Адыгэ Республикэм изаслуженнэ тренерэу Павел Зборовскэм.

— Сыдигъуа хэгъэгум изэ­нэкъокъу зежъу­гъэжьэ­щтыр?

— Чъэпыогъум и 6-м апэрэ къекIокIыгъом хэхьэрэ ешIэгъу­хэр къалэу Обнинскэ щытиIэщтых. Мы мафэхэм зэIукIэгъухэм зафэтэгъэхьазыры.

— «Динамо-МГТУ-м» изэ­хъокIыныгъэхэм тащы­гъэгъуазэба.

— ЕшIэкIуи 3 хэкIыжьыгъ, Уры­сыем икомандэ зэфэшъхьафхэм аштагъэх. Адыгеим щапIугъэ ныбжьыкIэхэр тикомандэ къед­гъэб­лэгъагъэх. 2000 — 2003-рэ илъэсхэм къэхъугъэ кIалэхэу «Динамо-МГТУ-м» къыхэхьагъэ­хэм яIэпэIэсэныгъэ хагъэхъон алъэкIыщт. 2007-рэ илъэсым къэхъугъэхэм яухьазырыныгъэ тэуплъэкIу. Къошк Амин, Кирилл Колбэ, нэмыкIхэр ешIэкIо дэгъу хъунхэ алъэкIыщт.

— Хэта Къошк Амин?

— Ащ ятэу Руслъан илъэсыбэ хъугъэу Мыекъуапэ икомандэ щешIэ, гуетыныгъэ хэлъэу ежьыри Iоф зыдешIэжьы. Республикэм щапIугъэ нэмыкI ныбжьыкIэхэм талъэплъэ.

— Урысыем и Кубок икъы­дэхын фэгъэхьыгъэ зэнэкъокъум шъухэлэжьэщтэу къытэпIогъагъ.

— Iоныгъом и 9-м Махачкала щыкIощт зэIукIэгъухэм тахэлэ­жьэщт.

— ШъузыдешIэщтхэр къы­таIоба?

— Ставрополь, Грознэм, Воронеж, Ростов-на-Дону, Мыекъуа­пэ, Махачкала якомандэхэр пэшIорыгъэшъ ешIэгъухэм ащызэIукIэщтых.

— Кубокым имызакъоу, хэгъэ­гум изэнэкъокъу зыфэшъогъэхьазыры. Шъузыфэбэнэщт чIыпIэм тыщыбгъэгъуазэ тшIоигъу.

— Адыгэ Респуб­ликэм иволейбол хэхъоныгъэхэр ешIых. 2021 — 2022-рэ илъэс зэнэкъо­къум я 5-рэ чIыпIэр къыщыдэтхыгъ. Опыт зиIэ ешIакIоу тикомандэ хэтыр нахь макIэ хъугъэми, я 5 — 6-рэ чIыпIэхэм тафэбэнэщт.

— ТизэдэгущыIэгъу икIэух сыда къытапIо пшIоигъор?

— Адыгэ Респуб­ликэм испорт псэуалъэхэм япчъагъэ хэхъо, зэтегъэпсы­хьагъэх. Адыгеим и ЛIышъхьэу КумпIыл Мурат, Правительствэм, Парламентым тафэраз. НыбжьыкIэхэр физкультурэм хэщэгъэнхэм, япсауныгъэ агъэ­пытэным тапылъ, спорт зэIукIэгъухэр афызэхэтэщэх. Мыекъо­пэ къэралыгъо технологическэ университетым иректорэу Къуижъ Саидэ зэхэщэн IофхэмкIэ сыдигъуи ишIуагъэ къытегъэкIы. Спортым пIуныгъэ мэхьанэу иIэр къэIэтыгъэным тишъып­къэу тыпылъ. Волейболыр, физкультурэр зыгу рихьыхэрэр тизэIукIэгъухэм ахэлэжьэнхэу къетэгъэб­лагъэх.

— Шъуигъэхъагъэхэр лъы­жъугъэкIотэнхэу ­шъуфэтэIо.

— Тхьауегъэпсэу.