Ящэнэрэ е ащ къыкIэлъыкIорэ сабыим ыныбжь илъэси 3 охъуфэ мазэ къэс ахъщэ IэпыIэгъу ятыгъэнымкIэ федеральнэ бюджетым къыхагъэкIырэ мылъку Iахьтедзэр 2022-рэ илъэсым шъолъырхэм зэратырагощэщт шIыкIэр УФ-м и Правительствэ ыухэсыгъ.

Президентэу Владимир Путиным 2012-рэ илъэсым ышIыгъэ УказымкIэ ащ фэдэ къэралыгъо IэпыIэгъур агъэфедэу аублагъ. А гухэлъым пае сомэ миллион 26-рэ мин 241,9-рэ Адыгеим къыIукIагъ. Ящэнэрэ сабыим е ащ къыкIэлъыкIохэрэм аныбжь илъэси 3 охъуфэ ахъщэ IэпыIэгъу ятыгъэнымкIэ федеральнэ субсидием мы илъэсым сомэ мин 299539,5-м нэсэу республикэм щыхэхъуагъ.

Адыгеим мылъку Iахьтедзэ къызэрэфыхагъэкIыщтым фэгъэхьыгъэ унашъор УФ-м и Правительствэ зиштагъэр УФ-м и Федеральнэ ЗэIукIэ бюджет мылъкур атегощэгъэнымкIэ икомиссие ащ къызыдырегъэштэ нэуж ары. АщкIэ Iэпы­Iэгъу къафэхъугъ Адыгэ Республикэм ыцIэкIэ Къэралыгъо Думэм идепутатэу, Къэралыгъо Думэм бюджетымкIэ ыкIи хэбзэIахьхэмкIэ икомитет хэтэу Владислав Резник.

«Адыгеим иIэшъхьэтетхэм сабыибэ зэрыс унагъохэм Iэпы­Iэгъу ягъэгъотыгъэным лъэшэу анаIэ тырагъэты. Сабыйхэр зэрыс унагъохэм федеральнэ мылъкоу къафыхагъэкIырэр нахьыбэ шIыгъэным тишъыпкъэу тапэкIи тыпылъыщт», — къыIуагъ Владислав Резник.

Шъугу къэтэгъэкIыжьы кIэлэцIыкIухэр зэрыс унагъохэм ахъщэ IэпыIэгъу ятыгъэнымкIэ УФ-м и Президент пшъэ­­ры­лъэу къафишIыгъэхэр зэрагъэцакIэ­хэрэм гъунэ лъыфыгъэнэу Адыгеим и ЛIышъхьэ зэригъэнэфагъэр. АР-м и ЛIышъхьэ къызэрэхигъэщыгъэмкIэ, зэрэхэгъэгоу зэрэщыщытым фэдэу, кIэлэцIыкIухэр зэрыс унагъохэм Iэпы­Iэгъу афэхъугъэнымкIэ амал зэфэ­шъхьафхэр Адыгейми щызэрахьэх.

«Сабыибэ зэрыс унагъохэр нахьыбэ хъунхэмкIэ ищыкIэгъэ амалхэр зетэхьэх. КIэлэцIыкIухэр зэрыс унагъохэм IэпыIэгъу зэрафэхъухэрэ Iофтхьэбзэ зэфэшъхьафхэр тадэжьи щызэрахьэх, УФ-м и Президентэу Владимир Путиным иуна­шъокIэ IэпыIэгъу лъэпкъхэу тихэгъэгу щаштагъэхэр тэри тэгъэфедэх. А пстэуми шIо­гъэшхо къаты, — къыIуагъ КъумпIыл Мурат.

АР-м и ЛIышъхьэ ипресс-къулыкъу