ЗекIо клубэу «Крокус» хэтхэм илъэсыбэрэ япэщагъэу, Адыгеим икъушъхьэхэр зэкIэ языгъэлъэгъугъэу, чIыопсым идэхагъэ опсэуфэкIэ емызэщыгъэ Бэгъ Аслъан шIэжь тамыгъэ фагъэуцунэу зыфэягъэхэр бэшIагъэ.

Къушъхьэ къэуцупIэу «Фыщт» зыфиIорэм ащ шIэжь мыжъобгъу къыщыфызэIуахыгъ. ЦIыфзэхахьэу зэхащэгъагъэм дзэ-патриотическэ клубэу «Вертикалым» икурсантхэр, клубэу «Крокус» хэтхэр, зекIо къэкIуагъэу Адыгеим зыщызыгъэпсэфыхэрэр, Кавказ биосфернэ заповедникым иIофышIэхэр хэлэжьагъэх.

Бэгъ Аслъан альпинистыгъ, спортымкIэ мастерыгъ, «Урысыем изекIо гъэшIуагъ» зыфиIорэ щытхъуцIэр къыфагъэшъошагъ, Кавказым икъокIыпIэ ыкIи икъохьэпIэ лъэ­ныкъохэм ащыIэ къушъхьэтхыхэм зэкIэми адэкIоягъ. Алтай, Саяны, Тянь-Шань, Памир, Къырым, Карпаты, нэмыкI чIыпIэхэм якъушъ­хьэхэми ащыIагъ.

Аслъан цIыфхэм лъытэныгъэ зыфашIырэ пэщагъ, ащ уасэ фэзышIыхэрэм чIышъхьа­шъом идэхагъэ шIу аригъэлъэгъун ылъэ­кIыгъ. ОпсэуфэкIэ шъхьэкIэфагъэ рахыгъ, ежьыр щымыIэжьми, зышIэхэрэм ишIэжь агъэлъапIэ.

Ащ ыцIэкIэ еджагъэх къушъхьэхэу ЧIыгъушъэрэ Джумарэкъорэ азыфагу щыIэ къушъхьэ зэпырыкIыпIэм (метрэ 2800-рэ илъэгагъ), псыхъоу Чесу иджабгъукIэ къыхэлъэдэрэ псыхъо цIыкIум, Шытхьэлэ къушъхьэ зэпырыкIыпIэм пэблагъэу щыIэ гъочIэгъым.

Кавказ заповедникым иIофышIэу Валентина Куцаям Бэгъ Аслъан гущыIэ фабэхэр къыфиIуагъэх:

— Кавказ заповедникым экологическэ зекIоныр щызэхэщэгъэнымкIэ Аслъан Iофышхо ышIагъ. ЗекIозещэхэу ыкIи къэгъэнэжьакIохэу ыгъэса­гъэхэр бэ мэхъух, ахэм ащыщых мы лъэхъанми заповедникым Iоф щызышIэхэрэр. Кавказыр къаухъумэзэ фэхыгъэ зэолIхэм ясаугъэтхэр заповедникым хагъэуцонхэмкIэ ишIогъэшхо къэ­кIуагъ.

Митингым къекIолIэгъагъэхэм Аслъан зыфэдагъэр агу къагъэкIыжьыгъ. Бэгъ Аслъан имыжъобгъу егъа­шIэм къушъхьэу Фыщт хэтыщт, исурэт къушъхьалъэхэм зэрахагъэуцуагъэмкIэ ар цIыфхэм къафэрэзэщт. Шъаукъо Аслъангуащ.