Iоныгъом и 9-м, и 10-м ыкIи и 11-м АР-м и Къэралыгъо Совет — Хасэм идепутатэу Тэхъутэмыкъое районымкIэ зы мандат зиIэ хэдзыпIэ коеу N 21-мкIэ ыкIи муниципальнэ образованиехэм янароднэ депутат хъущтхэмкIэ хэдзынхэр республикэм щыкIощтых.

АР-м ихэбзэгъэуцугъэу Къэ­ралыгъо Советым — Хасэм идепутат ихэдзын ехьылIагъэм диштэу АР-м и Къэралыгъо Совет — Хасэм идепутат хэ­дзын тедзэхэр Тэхъутэмыкъое районымкIэ зы мандат зиIэ хэдзыпIэ коеу N 21-м щызэхэщэгъэнхэм пае хэдзынхэмкIэ Гупчэ комиссием бюллетеньхэр ыгъэхьазырыгъэх. Пшъэдэ­кIы­жьэу ыхьырэмкIэ гъунэпкъэ гъэнэфагъэ зиIэ обществэу «Качествэм» ахэр къыщыхаутыгъэх.

АР-м хэдзынхэмкIэ и Гупчэ комиссие исекретарэу ХьацIэцIэ Фатимэ къызэриIуагъэмкIэ, зэкIэмкIи бюллетень мин 16 къыдагъэкIыгъ. Ахэр зэкIэ шапхъэхэм атетэу ухъумагъэх.

— АР-м ихэбзэгъэуцугъэ диштэу хэдзынхэр къэсынкIэ мэфэ 15 къэнагъэу бюллетеньхэр дгъэхьазырынхэ ыкIи ахэр хэдзынхэмкIэ чIыпIэ комиссиеу Тэхъутэмыкъое районым щыIэм IэкIэдгъэхьанхэ фае. Ар непэ гъэцэкIагъэ хъугъэ. Джащ фэдэу муниципальнэ образованиехэм янароднэ депутат хъущтхэм яхэдзынхэм пайи бюллетеньхэр тэгъэхьазырых, шышъхьэIум и 26-м ехъулIэу ахэр аIэкIэдгъэ­хьащтых, — къыIуагъ Ф. ХьэцIацIэм.

Iоныгъо мазэм Адыгэ Респуб­ликэм хэдзын кампание 43-рэ щыкIощт. АР-м и Къэралыгъо Совет — Хасэм Тэхъутэмыкъое районымкIэ зы мандат зиIэ хэдзыпIэ коеу N 21-м идепутат хадзыщт, чIыпIэ мэхьанэ зиIэ кампание 42-рэ муниципалитетхэм ащыкIощт. Хэдзынхэм языфэгъэхьазырын АР-м хэ­дзын­хэмкIэ и Гупчэ комиссие ипшъэрылъ. ЧIыпIэ комиссиеу 8 зэхащагъ, Мыекъуапэ нэмыкIэу муниципалитетхэм зэкIэми хэдзынхэр ащыкIощтых.

Типографием къыщыхаутыгъэ бюллетеньхэр къалъытэжьыгъэх, лыеу къыхаутыгъэхэр агъэкIодыжьыгъэх.

КIАРЭ Фатим. Сурэтыр Iэшъынэ Аслъан тырихыгъ.