Донецкэ Народнэ Республикэм илIыкIохэм къызэратыгъэмкIэ, калибрэ миллиметри 155-рэ хъурэ топыщэмкIэ Украинэм идзэкIолIхэр Донецкэ гупчэм дэуагъэх. Ежь Украинэм иIашэхэм анэмыкIэу Америкэм итопыщэу HIMARS зыфиIорэр агъэфедагъэу къычIагъэщыгъ.

«НАТО иIашэхэр пыим къызфигъэфеди Донецкэ игупчэ еуагъэх. Калибрэ миллиметри 155-рэ хъурэ артиллерийскэ топыщэмкIэ Ворошиловскэ районым тIогъогогъо еуагъэх. Ящэнэрэ огъум Америкэм итопыщэу HIMARS-р агъэфедагъ», — къыщеIо мэкъэгъэIум.

Донецкэ имэрэу Алексей Кулемзиным къызэриIуагъэмкIэ, къалэм и Ворошиловскэ ыкIи Калининскэ районхэм лъэшэу къяуагъэх, анахьэу Ворошиловскэ районым, къат пчъагъэу зэтет унэхэм ащыщ занкIэу еуагъэх, джащ фэдэу сатыушIыпIэ гупчэу Green PLAZA зыфиIорэми тырагъэфагъ. ПэшIорыгъэшъэу зэрагъэу­нэфыгъэмкIэ, нэбгырищ хэкIодагъ, нэбгырихмэ шъобжхэр атещагъэхэ хъугъэ.

Мурадэу яIагъэр Донецкэ Республикэм иадминистрацие ипащэу Денис Пушилиныр аукIынэу арыгъэ. Унэ зэтетэу топыщэр къызытефагъэм машIор къыкIани стыгъэ. Ежь Пушилиным зыпари къыщышIыгъэп, къызэряуагъэхэмкIэ Киев ыкIи КъохьапIэм итеррористхэр ащ егъэмысэх.

Джащ фэдэу хьакIэщэу «Централь» зыфиIоу Урысыем ижурналистхэр, волонтерхэр, общественнэ IофышIэхэр къызыщыуцухэрэм топыщэкIэ еуагъэх. Ащ пэгъунэгъоу щыт машинэхэм яшъхьа­ныгъупчъэхэр хиутыгъэх, бгъагъэр къытыриутыгъ, нэмыкI псэуалъэхэри зэхикъу­тагъэх.

Къалэм къеонхэу къызырагъажьэм, урамхэм цIыфыбэ атетыгъ ыкIи машинабэ щызэблэкIыщтыгъ. Автомобилым исхэу нэбгырэ заулэ хэкIодагъ.

ЦIыфхэр нахьыбэу зыщызэрэугъоирэ чIыпIэхэм ашIэзэ топыщэр ахадзагъ. Ахэр къэлэдэсхэм псыр къызыщырагъэ­хъорэ псыхъоу Кальмиус дэжь, сатыушIы­пIэ гупчэр ыкIи къат пчъагъэу зэтет унэхэр.

Украинэм «ипатриотхэм» агъэмэфэкIырэ «Украинэм ишъхьафитыныгъэ и Маф» зыфиIорэм мы лъыгъачъэр фагъэхьы­гъэу ары къызэраIорэр.