Финалым нэсыгъ
Адыгэ къэралыгъо университетым щеджэрэ Ольга Тимоновам ипроект шIэныгъэ-ушэтын IофшIэнхэмкIэ Урысые зэнэкъокъум ифинал ихьагъ.
Я VII-рэ Урысые ныбжьыкIэ форумэу «Наука будущего —наука молодых» зыфиIорэм IофшIэнхэм язэфэхьысыжьхэр щашIыщтых. Ар шышъхьэIум и 23-м къыщегъэжьагъэу и 26-м нэс Новосибирскэ я IX-рэ Дунэе форумэу «Технопром-2022» зыфиIорэм ыкIи Новосибирскэ къэралыгъо техническэ университетым ащыкIощт. Къэралыгъо 25-мэ яшIэныгъэлэжьхэр зэнэкъокъум ифинал ихьагъэхэм нэIуасэ афэхъущтых.
Урысыем ит апшъэрэ еджапIэхэм ыкIи шIэныгъэ организациехэм ястудент ыкIи аспирант нэбгырэ 2500-рэ мы илъэсым зэнэкъокъум хэлажьэхэ ашIоигъоу тхылъхэр къатыгъ. Ахэм ащыщэу шъолъыр 40-мэ къарыкIыгъэ ныбжьыкIэ 313-р финалым ихьагъэх ыкIи докладхэм къяджагъэх.
Ахэм ахэт Адыгэ къэралыгъо университетым социальнэ технологиехэмкIэ ыкIи зекIонымкIэ факультетым истуденткэу Ольга Тимоновар. НыбжьыкIэхэм ежь-ежьырэу хьадэгъур къызфамыхьыжьыным пэшIорыгъэшъэу Iоф дэшIэгъэныр ары проектыр зыфэгъэхьыгъэр. НыбжьыкIэ нэбгыри 100 фэдиз зыхэхьэгъэ куп агъэпси, ушэтынхэр ашIыгъэх, проектым къыдыхэлъытагъэу Iофтхьэбзэ гъэнэфагъэхэр зэхащагъэх.
«Наука будущего — наука молодых» зыфиIорэр УФ-м гъэсэныгъэмрэ шIэныгъэмрэкIэ и Министерствэ зэхещэ. НыбжьыкIэхэм шIэныгъэм мэхьэнэ ин ратыным, яшIэныгъэхэм ахагъэхъоным ыкIи IофшIэнымкIэ лъэгэпIэ инхэм анэсынхэм фэщэгъэнхэр ары пшъэрылъэу зэхэщакIохэм зыфагъэуцужьырэр. Форумым ипрограммэ лъэныкъуипшIыкIэ зэтеутыгъ, стратегическэ сессие 30 фэдиз, Iэнэ хъураехэр ыкIи шIэныгъэм епхыгъэ Iофтхьэбзэ зэфэшъхьафхэр зэхащэнхэу агъэнафэ.
Адыгэ къэралыгъо университетым ипресс-къулыкъу