Къоджэ псэупIэхэм хэхъоныгъэ ягъэшIыгъэным фэгъэхьыгъэ программэм къыдыхэлъытагъэу станицэу Джаджэм щырагъэжьэгъэ кIэлэцIыкIу IыгъыпIэм ишIын аухыгъ. «Чебурашка» ащ зэреджагъэхэр, нэбгырэ 250-мэ ателъытагъ.

АР-м мэкъумэщ хъызмэтымкIэ и Министерствэ къызэритыгъэмкIэ, квадратнэ метрэ 5673-рэ ащ зэлъеубыты, кIэлэцIыкIу джэгупIэ 12, физкультурэм пае площадки 2 ащ щагъэпсыгъ. ПстэумкIи псэуалъэм ишIын сомэ миллион 220-рэ пэIухьагъ.

КIэлэцIыкIу IыгъыпIэр охътэ благъэм къызэIуахыщт. Програмэм ишIуагъэкIэ, лъэхъаным къыздихьыгъэ амал пстэур агъэфедэзэ еджапIэм чIэмыхьэхэзэ гъэсэныгъэ зыщарагъэгъотыщт псэуалъэ станицэм иIэ хъугъэ. Ащ ыпэкIэ мы псэупIэм дэтыгъэу, жъы зэрэхъугъэм фэшI зэфашIыжьыгъэ IыгъыпIэм чIэсыгъэхэм ащыщхэри мыщ къащэжьыщтых.

Джащ фэдэу кIэлэцIыкIоу ипсауныгъэкIэ е ихэхъонкIэ ауж къинэхэрэм Iоф адэзышIэщт специалистхэр, логопед, психолог ыкIи дефектолог мы IыгъыпIэм иIэщтых.