ПАО-у «Зарем» идиректорхэм я Совет итхьаматэу Пщыжъ Щамсудин Пщымафэ ыкъор илъэс 70-м къехъугъэу дунаим ехы­жьыгъ.

ИцIыфыгъэкIэ, IэнатIэу зыIутымкIэ Адыгэ Респуб­ликэм, Урысыем ишъолъыр­хэм ащызэлъашIэщтыгъэ. Пщыжъ Щамсудин Пэнэжьыкъуае къыщыхъугъ, щыIэныгъэ гъогоу къыкIугъэр тарихъым хэкIокIэщтэп.

АР-м иIофшIэпIэ анахь инхэм ащыщэу ПАО-у «Зарем» зыфиIорэм 1996 – 2018-рэ илъэсхэм ипэщагъ. IофшIапIэр зыпкъ игъэуцо­жьыгъэным, хэгъэгум щыкIорэ зэхъокIыныгъэхэм къызыдахьыгъэ къиныгъо­хэр къызэнэкIыгъэнхэм чанэу адэлэжьагъ. Промышленностым пае редукторхэр къыдэгъэкIыгъэнхэм фэшI шIыкIэшIухэр къыгъотыгъэх. Урысыем имызакъоу, IэкIыб къэралхэм Мыекъуапэ къыщашIырэ редукторхэр, нэмыкIхэр алъыIэсыщтыгъэх.

2009-рэ илъэсым къыщегъэжьагъэу АРО-у «СоюзМаш Россием» итхьамэтагъ. Общественнэ пшъэрылъхэр ыгъэцакIэхэзэ, цIыф цIэрыIо хъугъэ. Адыгеим иэкономикэ къэIэтыгъэным, Адыгэ Республикэм икъэралыгъо гъэпсыкIэ игъэпытэн фэгъэ­хьыгъэ зэхэщэн Iофхэр зэрихьэхэзэ, щысэшIу къыгъэлъагъощтыгъ.

Адыгабзэм изэгъэшIэн, игъэфедэн, лъэпкъ шэн-хабзэхэр къэухъумэгъэнхэм, шIэжь яIэу ныбжьыкIэхэр пIугъэнхэм, нэмыкI Iофхэм лъэшэу агъэгумэкIыщтыгъ. Республикэ общественнэ движениеу «Адыгэ Хасэр» кIэщакIо зыфэхъурэ Iофтхьабзэхэр щыIэныгъэм щыпхырыщыгъэнхэмкIэ IэпыIэгъу къытфэхъущтыгъ. IэкIыб къэралхэм ащыпсэурэ тилъэпкъэгъухэм зэпхыныгъэу адытиIэр уахътэм диштэу зэхэщэгъэным фэшI амалышIухэр къыгъотыщтыгъэх. IэкIыб къэралхэм къарыкIыжьыгъэ тилъэпкъэгъухэм аIукIэщтыгъ, ишIуагъэ аригъэкIыщтыгъ.

Щ. Пщыжъым гулъытэ ин иIагъ, ныбджэгъушIугъ, цIыфхэм шIу афишIэ шIоигъоу къытхэтыгъ. Адыгэ Республикэм лъэпкъы­бэ зэрэщыпсэурэм къыпкъырыкIызэ, язэпхыныгъэхэр гъэпытэгъэнхэм сыдигъуи пылъыгъ. IофшIэным иветеранхэм, сэкъатныгъэ зиIэхэм игукIэгъукIэ алъыIэсыныр ипшъэрылъэу ылъы­тэщтыгъ.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ мэфэкI зэхахьэхэм ахэлэжьэнэу, игушIуагъо къыддигощынэу Щ. Пщыжъым инасып къыхьыгъэп. Адыгэ Хасэм и Хэсашъхьэ иупчIэжьэгъоу ар щытыгъ. Хабзэм икъулыкъушIэхэмрэ Адыгэ Хасэм хэтхэмрэ зэгурыIоныгъэ ахэлъэу зэдэлэжьэнхэм икIэщакIоу хэкIыпIэхэр къыгъотыщтыгъэх.

Пщыжъ Щамсудин ыгу къытемыожьырэми, ныбджэгъушIоу, зэхэщэкIо дэгъоу зэрэтиIагъэр тщыгъупшэщтэп, ишIушIагъэ дгъэлъэпIэщт, щысэ тетхыщт.

ЩымыIэжьым иIахьылхэм, иунагъо якъин адэтэIэты. Пщыжъ Щамсудин Тхьэм джэнэт лъапIэ къыритынэу тыфэлъаIо.

Республикэ общественнэ движениеу «Адыгэ Хасэм» хэтхэр, ныбджэгъухэр.